Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Ақмола облысы бойынша департаментінің басшысы Асхат Оразхан Өңірлік коммуникациялар қызметінде осы жылдың он бір айының жұмыс қорытындылары туралы брифинг өткізіп, БАҚ өкілдерінің қойған сауалдарына жауап берді.
Жемқорлық – адамзат пен қоғам ның дамуын тежейтін жал пыға ортақ індет. Онымен күресу тек құзырлы органдардың емес, барлық қоғам мүшелерінің бас ты міндеті болу қажет.
Жалпы ағымдағы жылы Сыбайлас жемқорлыққа қарсы іс-қимыл агенттігінің Ақмола облысы бойынша департаменті облыстың уәкілетті органдарымен және қоғам белсенділерімен бірлесіп, сыбайлас жемқорлық тәуекелдеріне көбірек ұшырайтын әлеуметтік маңызы бар салаларда 6 сыртқы талдау және 4 сыбайлас жемқорлыққа қарсы мониторинг жүргізді. Нәтижесінде анықталған сыбайлас жемқорлық тәуекелдерін жою бойынша уәкілетті органдарға 56 ұсынымдар енгізілді.
Сыбайлас жемқорлық тәуекелдері жол құрылысы мен жөндеуді жоспарлаудан бастап, бақылау мен күтіп ұстауға дейінгі барлық кезеңдерінде анықталды. Анықталған тәуекелдер мен заң бұзушылықтар облыс әкімі жанындағы ведомствоаралық комиссия отырысында қаралды. Оларды жою жоспары белгіленді, оның орындалуы бақылауда.
Автожол саласында бірқатар заңсыздық анықталып отыр. Жолдарды жөндеуге қатысты жобалық сметалық құжаттамада бағаны негізсіз өсірудің 3 фактісі тіркелді. Сондай-ақ, мердігерлердің сапасыз құрылыс материалдарын қолданғаны да анықталды. Бұл өз кезегінде жолдарды пайдалану мерзіміне кері әсер ететіні сөзсіз.
–Мәселен, Аршалы ауданында облыстық маңызы бар автомобиль жолдарын күрделі жөндеу жобасы бойынша сметаның құны 764 миллион теңгеге негізсіз артық көрсетілген. Жобада уақытша айналма жолдың құны 764 миллион теңгеден 1 миллиард 100 миллион теңгеге дейін өсіріліп жіберілген. Осыған орай, біз облыс әкімдігіне хат жолдадық. Нәтижесінде жобаның бағасы қайта қаралып, үнемделген 512 миллион теңгеге Целиноград ауданына қарасты Қоянды ауылында су құбыры салынды. Талдау қорытындылары бойынша ұсынымдарды орындау аясында ауыл шаруашылығы саласында департамент қабылдаған шаралардың нәтижесінде облыстық мемлекеттік қызмет департаментімен бірлесіп, ауыл шаруашылығы министрлігіне 600 миллион теңгеден астам сомаға субсидиялар алуға өтінімдерді қайта беру жолымен 300-ге жуық фермердің құқықтары қалпына келтірілді. Бұдан басқа, департамент білім беру саласында жемқорлық жағдайларын болдырмау мақсатында қол қойылған Жергілікті атқарушы органдардың Жол картасын іске асыру мониторингін жалғастыруда, – деді өз сөзінде Асхат Оразхан.
Осы білім беру саласында есепшілердің қаражатты жымқыру деректері анықталған. Мұндай жағдай Астрахан ауданы мен Степногорск қаласында да тіркелген. Мектептерде аванс төленіп келген. Сондай-ақ, өзгелердің реквизиттері бойынша өздерінің есепшоттарына қаржы аударып отырған. Мұндай тәуекелдерді жою мақсатында «Бухгалтерлік операциялар мәліметтерінің бірыңғай сақтау орны» жобасы жасалды. Бұдан басқа жергілікті деңгейде бюджеттік өтінімдерді қалыптастыру үдерісін цифрландыру жүзеге асырылуда. Брифингте айтылған осы жайларға байланысты журналистер сауалдары туындап, департамент басшысы олардың да толыққанды жауабын берді.
Салтанат БӘКІРОВА,
«Арқа ажарының» өз тілшісі.
