Осы Қоянды ауылында «Қоянды Оңтүстік» қосалқы станциясында жүргізілген жөндеу-қалпына келтіру жұмыстары аяқталды. Электр қуатымен жабдықтау нысанын Ақмола облысының әкімі Марат Ахметжанов барып көріп, жаңғырту жұмыстарының нәтижелерімен танысты.
Сапар аясында «АРЭК» АҚ бас директоры Александр Павлов атқарылған жұмыстар туралы есеп берді. Бұл жоба Қоянды, Аққайың, Шұбары, Софиевка, Ақжар және Опан ауылдарындағы 30 мыңнан астам абонентті тұрақты электр қуатымен қамтамасыз етуге мүмкіндік бермек.
Жаңғырту аясында 26 вакуумдық ұяшық пен жаңа қуатты трансформаторлар орнатылды. Соның нәтижесінде электр қуатын жеткізуде кедергілер жойылған.
Облыс басшысы өз кезегінде өңірдің тұрақты дамуы үшін энергетика инфрақұрылымы нысандарын жаңғыртудың маңыздылығын атап өтті.
– Қазіргі заманғы энергетикалық жүйелер тұрғындардың жайлы өмір сүруі мен экономиканың дамуының негізгі көзі. «Қоянды Оңтүстік» қосалқы станциясын жаңғырту жұмыстарының аяқталуы аудан тұрғындарын үздіксіз электр қуатымен қамтамасыз ету жолындағы маңызды қадам, – деді Марат Ахметжанов.
Аймақта халық саны мен әлеуметтік нысандардың белсенді өсуіне байланысты ескірген энергия көздерін қайта жаңғыртудың қажеттілігі туындаған.
– Бұл қосалқы станциядан Целиноград және Аршалы аудандарының тұрғындары да қосымша электр қуатымен қамтамасыз етіледі. Орнатылған жаңа жүйелердің арқасында енді жарық жиі сөнетін абоненттердің саны барынша азаяды, – деді «АРЭК» АҚ бас директоры.
Мұндай инфрақұрылымдық жобаларды іске асыру өңір үшін басымдық болып қала береді, өйткені, бұл халықтың өмір сүру сапасын жақсартып, аумақтардың одан әрі дамуына жағдай жасайды. Осы бағыттағы жұмыстар алдағы уақытта да жалғасын таппақ.
Ақмола облысы әкімінің баспасөз қызметі.
