Ақмола облысының әкімі Марат Ахметжанов көптен бері тұрғын үй кезегінде тұрған халықтың әлеуметтік жағынан осал топтарына жаңа пәтерлердің кілттерін табыс етті.
Өңір басшысы алғашқы құттықтау сөзінде Мемлекет басшысы Қасым-Жомарт Тоқаев бірінші кезекте қазақстандықтардың әлеуметтік жағдайы мен өмір сүру сапасының артуына бағытталған әлеуметік жобаларды жүзеге асыруға ерекше назар аударып келе жатқандығын атап өтті. Жыл санап Ақмола облысында да жаңа тұрғын үйлер мен әлеуметтік нысандар көбірек салынуда. Өңірдің тұрғын үй құрылысына қазірдің өзінде 200 миллиард теңгеден астам инвестиция салынған. Осылайша бүгінгі таңда 12 мыңнан астам ақмолалық отбасының тұрғын үй мәселесі шешілген. Биылғы жылы да екі мыңға тарта пәтер бөлініп, әртүрлі халық санатын баспанамен қамтамасыз ету жоспарланыпты.
– Президенттің тапсырмасы бойынша тұрғын үй мәселесін шешу тәсілдері өзгерді. Азаматтарды баспанамен қамтамасыз ету бойынша қосымша шаралар қабылданды. Өткен жылы республикалық бюджеттен әлеуметтік осал санаттағы азаматтарға арналған 850 пәтер сатып алуға қаражат бөлінді. Оның ішінде өзінің тиімділігін көрсеткен дайын тұрғын үйлерді сатып алу бағдарламасы бойынша пәтерлер алынды. Бұл қатарда Қосшы қаласының да 180 тұрғыны бар. Қаланың әр бөлігінен жақсы жағдайдағы пәтерлер арнайы таңдалып, әлеуметтік және білім беру нысандары жақын орналасуы ескерілді. Біз бұл бағытта бүкіл облыс бойынша осы жұмысты жалғастыратын боламыз. Нарықта сұраныс та бар. Мәселен, аудандарда жайлы пәтерлер сатып алынып жатыр. Бұдан әрі тұрғын үй иелері өз пәтерлерін қалдық құны бойынша сатып ала алады, – деп атап өтті Марат Ахметжанов.
Баспаналы болып, бақыттан басы айналған тұрғындар Мемлекет басшысынан бастап өңір басшылығына дейін алғыстарын жаудырды.
– Мен 12 жыл бойы Елордада тұрып, пәтер кезегін күттім. Бұл біздің отбасы үшін аса үлкен қуаныш. Президентіміз Қасым-Жомарт Тоқаевтқа осы бағдарлама үшін, облыс, қаламыздың әкімшілігіне жүргізген жұмыстары үшін зор алғысымды білдіремін, – деді Гүлнар Жақсыбекова.
Баспаналы болған тұрғындардың бірі тіпті, әлі осы күнге жеткеніне сене алмай тұрғанын айтып, эмоциялық көңіл-күйін жеткізді.
– Мен өзімнің бір бөлмелі пәтерімді әлі көрген де жоқпын. Бірақ, мені сондай аса үлкен қуаныш кернеп тұр. Қатты толқып тұрмын. Тіпті, менің кезегім дәл осылай тез келгеніне сене де алар емеспін, – дейді жиырма бес жастағы Александр Томас.
Өңір басшысы жаңа қоныс иелерінің үйін аралап шықты. Қалада жаңадан салынған тұрғын үйлерден баспаналы болғандардың қатарында көп балалы, толық емес, бірінші және екінші топтағы мүгедектігі бар отбасылар мен жетім балалар да бар.
–Төрт жылдан астам уақыт бойы толық емес отбасы ретінде кезекте тұрдық. Мемлекет басшысына, облыс әкіміне және біздің отбасына көмегін тигізген барлық жандарға шынайы алғысымды білдіремін, – дейді екі баланың анасы Қаракөз Боранбай.
Тұрғындар көп жыл кезек күткенімен, жайлы пәтерлерге бірден-ақ көшіп келуге болатынын қуанышпен жеткізді.
– Біз кезек күткенімізге үш жылдан асты. Пәтердің өте жайлы әрі ыңғайлы екені қатты қуантты. Бірден көшіп келіп тұра беруге болады, – дейді қуанышын жасыра алмаған көп балалы ана Фарида Төремұратова.
Тұрғын үй құрылысын салушы мердігер компания өкілі пәтерлердің жайлы болуына барлық жағдайдың жасалғанын баяндады.
– Бес қабатты үйде 210 пәтер бар. Тұрғын үй газды блоктың патенттелген технологиясымен тұрғызылған және эконом класқа жатады. Орталықтандырылған жылумен жабдықталған. Пәтерлер әдемі әрлеумен тапсырылып отыр. Үйдің өзі кең аулалы балалар ойын алаңымен салынды, – дейді құрылыс компаниясының өкілі Дәурен Галеев.
Айта кетсек, тек бір жыл ішінде ғана мемлекеттік тұрғын үй қорынан пәтер алу кезегінде тұрған 2,5 мыңнан астам ақмолалық отбасылардың тұрғын үй жағдайлары жақсарған. Он ауданда 850 пәтер сатып алынған. Жалпы, өңірде 661 мың шаршы метр тұрғын үй пайдалануға берілген. Бұл дегеніңіз 6,3 мың ақмолалық жаңа әрі жайлы пәтерде тұрады деген сөз.
Вероника БУРДА,
Майра ҚУАНЫШҚЫЗЫ.
Қосшы қаласы.
7 Total Views , 1 Views Today
