Қосшы қаласында көпбейінді жаңа облыстық аурухананың құрылысы қарқынды жүріп жатыр. Емдеу мекемесі 350 орынға лайықталған және Қосшы қаласы мен елорда маңындағы жеті өңірдің тұрғындарына қызмет көрсетеді. Аурухана «Viamedis» компаниясының жеке инвестициялары есебінен салынуда. Жобаның жалпы инвестиция көлемі 28 миллиард теңгеден асады.
Оның 17 миллиард теңгесі құрылыс жұмыстарына, ал, 9 миллиард теңгеден астамы аурухананы заманауи медициналық жабдықтармен қамтамасыз етуге жұмсалмақшы. Жаңа емдеу мекемесінің базасында ауысымына 1000 адам қабылдайтын емхана, сондай-ақ, хирургия, травматология, кардиохирургия, нейрохирургия, онкология және химиотерапия бөлімшелері жұмыс істейтін болады.
Аурухананың құрылысы екі бөлікке бөлінген – емхана және стационар. «Viamedis» ЖШС-нің бас директоры Әсет Ахметовтың айтуынша, негізгі құрылыс жұмыстары 2025 жылдың ақпан айының ортасына дейін аяқталады. Кейін мамыр айына дейін ғимараттың сырты мен аумағы абаттандырылатын болады.
– Жыл соңына дейін қала тұрғындарына арналған емхана іске қосылады. Жоба бойынша стационар 2026 жылдың соңында іске қосылуы тиіс еді. Бірақ, қазір біз 2026 жылдың үшінші тоқсанында стационарды ашуды жоспарлап отырмыз. Құрылыс материалдары бойынша жергілікті өндірушілермен жұмыс істеуге тырысудамыз, – дейді Әсет Ахметов.
Қазіргі таңда құрылыс-монтаж жұмыстарына екі жүзге жуық адам тартылған. Олардың қатарында «Viamedis» ЖШС-нің электригі Бахтияр Ыбырайұлы да бар.
– Қазіргі кезде бетон плиталарды жылыту және біріктіру жұмыстарын атқарудамыз. Біз қаншалықты маңызды нысанды салып жатқанымызды түсінеміз. Себебі, аурухананы Мемлекет басшысының тапсырмасы бойынша салып жатырмыз. Сонымен қатар, 2025 жыл – Жұмысшы мамандықтары жылы. Сондықтан, жаңа нысан сапалы салынуы керек, – деп ой түйеді ол.
Бұл көпбейінді жаңа аурухана мен емхананы салу туралы шешім 2024 жылдың маусым айында қабылданған болатын. Сол кезде Ақмола облыстық әкімдігі мен «Viamedis» компаниясы арасында меморандумға қол қойылған еді.
Ақмола облысы әкімінің баспасөз қызметі.
Қосшы қаласы.
