Кеше Ақмола облысы әкімінің орынбасары Досұлан Айтбаев жұмыс сапарымен Сандықтау ауданының Петровка ауылында болып, село тұрғындары көптен күткен 80 орындық жаңа мектепті аралап көріп, облыс әкімінің атынан сый-сияпаттар жасады.
Алпысқа жуық 1-9 сынып оқушылары үшін қаңтардың соңғы оқу аптасы жаңа ғимаратта басталды. Бұл оқушылар, ұстаздар және ата-аналар үшін үлкен оқиға екенін айтудың қажеті жоқ, өйткені, бұған дейін балалар жүз жылдан астам уақыт бұрын салынған ескі мектепте оқуға мәжбүр болған.
– Бұл әзірге 80 орынға арналған негізгі мектеп. Мұнда оқытушылар құрамы толық құрамда жұмыс істей бастады; 27 қаңтарда 58 оқушы жаңа мектеп табалдырығын алғаш аттаса, алтауы мектепалды даярлық сыныбында оқиды. Сондай-ақ, екі қабатты ғимаратта шағын орталыққа арналған орын бар, қазір оған он бала барады. Мердігер «Өркен» жауапкершілігі шектеулі серіктестігінің қысқа мерзімде атқарған жұмыстарына алғысымызды білдіреміз. Енді биылғы көктемде абаттандыру жұмыстарын аяқтау ғана қалды, – дейді Сандықтау аудандық білім бөлімінің басшысы Арай Әбенова.
Жаңа мектеп жаңа технологиямен жабдықталған, сондықтан, облыста салынған жайлы тоғыз мектептің ешқайсысынан кем түспейді. Мұнда мультимедиялық кабинет, химия, физика, биология кабинеттері, кітапхана, спорт залы, шеберханалар, фельдшерлік пункт, асханасы бар. Оқу орны қажетті қауіпсіздік талаптарына сай келеді.
– Мемлекет білім сапасын арттыру және жалпы білім беру саласын дамыту үшін барлық жағдайды жасауда. Ақмола облысында тоғыз жайлы мектеп салынып, пайдалануға берілді. Петровкадағы мектеп құрылысы объективті себептермен біршама кешіктірілді. Облыс әкімі құрылыс алаңын өзі аралап көрді, одан кейін жаңа мектепті тезірек аяқтау жөнінде тапсырмалар берілді. Біз сапаға және құрылыс мерзіміне нақты талаптар қоя отырып, қысқа мерзімде жаңа мердігер таптық. Соның нәтижесінде жаңа мектеп табалдырығын алғаш аттаған қазіргі шәкірттер бұл сәтті көпке дейін есте сақтайтынына сенімдімін, – деді облыс әкімі Марат Ахметжановтың атынан ұстаздар мен оқушыларды және ата-аналарды жаңа білім ордасымен құттықтаған облыс әкімінің орынбасары.
Балаларды шығарып салған Петровка тұрғындары мектептен шығуға асықпады, жарық дәліздерді және жайлы жиһазбен жабдықталған сыныптарды тамашалады.
– Биылғы оқу жылында бірінші сыныпқа барған екінші баламды бүгін жаңа мектепке әкелдім. Енді балаларымның осындай тамаша жағдайда, жылы да жайлы ортада оқитынына өте қуаныштымын. Ескі ғимаратпен салыстырғанда, айырмашылық жер мен көктей, – деген қуанышын жасыра алмады ата-аналар атынан сөз алған үш баланың анасы Надежда Савельева.
Сол күні Досұлан Айтбаев аудан орталығы Балкашино ауылындағы музыкалық мектебі бар шығармашылық үйі мен жыл бойы жұмыс істейтін «Жасдәурен» балалар сауықтыру лагерінде болып, олардың да тыныс-тіршілігімен танысты.
Алексей ЧАЙКА
Асылай ҚАДЫРҚЫЗЫ.
Сандықтау ауданы.
Суреттерді түсірген Нұрболат БЕКТҰРҒАНОВ.
13 Total Views , 1 Views Today
