Қазақстан Республикасы Премьер-министрінің орынбасары Тамара Дүйсенованың төрағалығымен өткен кеңесте дәрілік заттарды таңбалау және оның қозғалысын бақылау жүйесі жұмысының аралық нәтижелері қарастырылды.
Кеңес жұмысына Денсаулық сақтау министрлігі, «СҚ Фармация» және «Қазақтелеком» компанияларының өкілдері қатысты.
Денсаулық сақтау вице-министрі Ербол Оспановтың келтірген дерегінше, жүйе енгізілгелі бері елдегі емдеу мекемелері 16,5 миллион, ал дәріханалар 21,5 миллионнан аса таңбаланған дәрілік заттарды қабылдаған. Сонымен қатар, шамамен 12 миллион дәрі қаптамасын сатқан.
Айта кету керек, дәрілік заттарды таңбалау және бақылау жүйесі елімізде өндірілген немесе сырттан әкелінген әрбір дәрі-дәрмектің айналымнан толық алып тастағанға дейінгі қозғалысын онлайн режимінде қашықтан бақылауға мүмкіндік береді.
– Басты мақсат – азаматтарды қауіпсіз әрі сапалы дәрі-дәрмекпен қамтамасыз ету. Ашық бақылау контрафактілі дәрілердің айналымға түсуіне жол бермейді және Денсаулық сақтау министрлігі мен жергілікті әкімдіктерге емдеу мекемелерінің дәрілік заттармен қамтылу деңгейін бақылауға жағдай жасайды. Сондай-ақ, дәрі-дәрмектің мақсатты қолданылуын қадағалауға мүмкіндік беретінін атап өткім келеді. Сондықтан, бұл тетікті мейлінше пайдалана отырып, қажет болған жағдайда тиісті шараларды қабылдау қажет, – деп тапсырды Тамара Дүйсенова.
primeminister.kz
4 Total Views , 1 Views Today
