Айтыс
Көкшетау қаласында қазақтың ұлы ақыны, философ, халық ағартушысы, қазақ жазба әдебиетінің негізін қалаушы Абай Құнанбайұлының 180 жылдығы аясында дәстүрлі «Бала ақын – жас дарын» аймақтық оқушылар айтысы өтті.
Бұл айтыс Абай Құнанбайұлының бізге жеткен бай мұрасын, рухани тағылымын өнеге ету, қазақтың төл өнерін жастар арасында насихаттау, өңірімізде айтыс өнерін одан әрі дамытып, сапалық деңгейін көтеру, оқушылардың суырыпсалмалық қабілеттерін шыңдау, талантты жас ақындардың ақындық шеберлігін жетілдіру, көпшілікке танылуына мүмкіндік жасау мақсатында өткізілді.
Ақмола облысы мәдениет басқармасының басшысы Айгүл Сәбитова Ақмола облысы әкімі Марат Ахметжановтың атынан жас ақындарды құттықтап, ЮНЕСКО қорғауындағы материалдық емес мәдени мұралар тізіміне енген айтыс өнерін жалғастырып жүрген буынға алғысын білдіре отырып, биыл облыста бір халықаралық, бір республикалық, төрт облыстық, төрт аудандық деңгейде, барлығы 10 ақындар айтысы жоспарланғанын атап көрсетті.
Айтысқа Қостанай, Қарағанды және Ақмола облыстарынан 14-18 жас аралығындағы 10 жас ақын қатысып, хәкім Абайдың мерейтойына арналған өнер жарысында Абай мұралары арқылы ұлт әдебиетінің табыстарын жырға қосты.
Айтыс қорытындысы бойынша бас жүлде мен 250 000 теңге сомасындағы ақшалай сертификатты Қостанай облысының жас ақыны Нұрислам Рағат жеңіп алды.
Жүлделі бірінші орын мен 200 000 теңге сомасындағы ақшалай сертификатты Ерейментау ауданынан Сәттібек Серікболат иеленсе, екінші орын мен 150 000 теңге сомасындағы ақшалай сертификат Бұланды ауданынан Сырым Хызырбекке бұйырды. Үшінші орын мен 100 000 теңге сомасындағы ақшалай сертификатты Бұланды ауданынан Нұрғиса Елеш еншіледі.
Қалған жас айтыс өрендері аймақтық оқушылар айтысына белсене қатысқаны үшін ұйымдастыру алқасының дипломдары және 50 000 теңге ақшалай сертификатымен марапатталды.
«Арқа ажарының» өз ақпараты.
