Ұлттық құрылтай
Бурабай ауданының жергілікті билігі мәдениет саласын дамытуға айтарлықтай көңіл бөлуде. Айталық, бүгінде ауданда 38 мәдениет мекемесі жұмыс істеп тұр. Аймақтағы алты шығармашылық ұжым «халықтық» мәртебеге ие болып, үш ұжым «үлгілі» деп танылды.
Аудан әкімінің орынбасары Мерей Рамазан мәдениет аймақтың рухани байлығын арттыру, сондай-ақ, әлеуметтік өмірді жақсарту үшін маңызды сала болып табылатындығын атап өтті. Оның пікірінше, мәдениет арқылы халықтың бірлігі мен ынтымақтастығын нығайтуға және өскелең ұрпақты жан-жақты дамытуға ықпал етуге болады.
– Біз мәдениет саласының дамуына ерекше назар аударамыз, себебі, бұл тек аудан тұрғындарының рухани байлығын арттыруға ғана емес, қоғамның әлеуметтік дамуына да үлкен әсер етеді. Осы жылы еліміздегі айтулы оқиға – Ұлттық құрылтайдың Бурабай баурайында өтетіні біз үшін үлкен мәртебе. Қазір оған қызу дайындық жүргізілуде, – деді ол брифинг барысында.
Бүгінде Бурабай ауданындағы 38 мәдениет мекемесінің сегізі клуб пен мәдениет үйі болса, 30-ы кітапхана. Мәдениет саласына тартылып жатқан инвестициялардың нәтижесінде, өткен жылы аудандық кітапхана қоры жаңартылып, білім мен асыл қазынаның рухани ошағы жаңа жылда өз жұмысын жаңа леппен бастаған болатын.
– Ауданның рухани ошақтарының халық арасында сұранысына лайық болып жатқаны да біз үшін үлкен жетістік. Біз ауданның мәдени деңгейін көтеру үшін жұмыс істеп жатырмыз және бұл жұмыстардың нәтижесін көріп отырмыз, – деп толықтырды аудан әкімінің орынбасары.
Салыстырмалы түрде назар аударсақ, мәдениет саласы аудан құрамына кіретін ауылдарда да дамып келеді. Яғни, сұраныс бар. Шалғай ауылдардағы мәдениет үйлеріне де жөндеу жұмыстары жүргізіліп жатыр. Ағымдағы жылы Ұрымқай ауылының мәдениет үйін жаңарту жоспарланып отыр.
Өңірлік коммуникациялар қызметі.
