Жайлы қоныс
Аудан орталығы Балкашино ауылындағы екі қабатты үйден 16 отбасы жаңа баспанаға ие болды. Тұрғындардың әлеуметтік жағынан осал топтары санатындағы ауыл тұрғындары, соның ішінде көпбалалы отбасылар мен жетім балалар үшін жергілікті бюджет есебінен осынша жаңа пәтерлер сатып алынды.
– Мемлекет басшысы Қасым-Жомарт Тоқаевтың бастамасымен елімізде халықты тұрғын үймен қамтамасыз етуге бағытталған бағдарламалар жүзеге асырылуда. Бұл бастаманың әлеуметтік жағынан аса мұқтаж жандарға көмек көрсетуге арналуы ерекше қуантады, – деп атап өтті аудан әкімі Серік Құдабай пәтер кілттерін тапсыру салтанатында.
– Алты айда 16 пәтерлі тұрғын үй әдемі әрлеуімен салынды. Құрылыста Қазақстанда өндірілген материалдар, оның ішінде Көкшетаудағы «ENKI» зауытының кірпіштері пайдаланылды. Үй орталық коммуникациялармен, жылумен, сумен, канализациямен және электр қуатымен қамтамасыз етілді. Әрбір пәтерде су жылытқыштары, санузелдер, ванналар мен раковиналар қойылып, еденге линолеум төселген. Сондықтан, тұрғындарға бірден осында көшіп келіп, тұруларына мүмкіндік мол, – деп атап өтті өз сөзінде «ИП Абдрахманов» Көкшетау құрылыс компаниясының бригадирі Асхат Жүнісов.
Аудандық тұрғын үй-коммуналдық шаруашылығы бөлімі басшысының міндетін атқарушы Зейнолла Есмағұловтың айтуынша, 2022 жылы мұнда үш үй салынып, жекешелендіру құқығынсыз 117 пәтер пайдалануға берілген. Енді тұрғындар біртіндеп бұл пәтерлерді қалдық құны бойынша сатып алып, жекешелендіретін болады. Кезекте тұрғандар саны бірте-бірте азайып келеді, қазір 178 сандықтаулық тұрғын үй мәселесінің шешімін күтіп отыр.
Жаңа пәтерлермен қамтамасыз еткен мемлекеттің қамқорлығына балкашиндық қоныстанушылар үлкен ризашылықтарын білдіріп, қуанып жатты. Көңілдері толған жаңа тұрғындар атап өткеніндей, өздері үшін ендігі ең басты міндет – үйдің өзін және айналасындағы қоршаған ортаны таза және ұқыпты ұстау.
Дорогинка ауылының тұрғыны 23 жастағы Анжела Мовчан жетім қалған балалардың бірі ретінде 2014 жылдан бері баспана кезегінде тұрған. Жас ана өзінің жаңа пәтерін көруді асыға күтіпті.
– Бүгін біздің отбасымыз үшін күтпеген ең қуанышты оқиға болды. Екі бөлмелі жайлы пәтерге ие болдық. Мемлекетіміздің қазақстандықтардың әл-ауқатын жақсартуға осындай орасан зор көмек көрсетіп жатқаны үшін ел Президенті мен аудан басшылығына шын жүректен алғыс айтамыз. Мен екі баламды жалғыз тәрбиелеп келемін, жаңа пәтерімді бес жыл күттім. Барша жерлестеріме денсаулық, амандық және бейбітшілік тілеймін, – деді Александра Гречихина.
– Біз өте бақыттымыз. Көз алдыңызға елестете аласыз ба, мен пәтерлерді қараған кезде, біздікі алтыншы пәтер болатынын іштей сездім. Бұл оқиғаның дәл осылай болғаны таңқалдырады, – деген қуанышымен бөлісті жаңа үйден екі бөлмелі пәтер алған төрт балалы ана Ксения Мельникова да.
Өткен жылы облысымыздың 10 өңірінде облыс әкімдігі ақмолалықтар үшін 850 пәтер сатып алған болатын. Ал, биыл 1000-нан астам жаңа пәтер кілтін табыстау жоспарлануда. Құрылыстың сапалы болуы, жақсы жөндеу және ыңғайлы инфрақұрылым, жақын жерде білім беру мекемелері мен басқа да әлеуметтік нысандардың орналасуы құрылысты салушыларға қойылатын ең басты талаптар.
Вероника БУРДА.
Асылай ҚАДЫРҚЫЗЫ.
Сандықтау ауданы.
6 Total Views , 1 Views Today
