Заң және тәртіп
Ақмола облысының мемлекеттік сәулет-құрылыс бақылау басқармасы өз қызметін «Қазақстан Республикасындағы сәулет, қала құрылысы және құрылыс қызметі туралы» ҚР Заңына, «Әкімшілік құқық бұзушылық туралы» ҚР Кодексіне, Кәсіпкерлік кодексіне және құрылыс саласындағы басқа да заңнамалық актілерге сәйкес жүзеге асырады.
Басқарма қызметінің негізгі бағыты Ақмола облысының аумағында салынып жатқан объектілердің сапасын бақылау болып табылады. Мәселен, 2024 жылы басқарма жоспардан тыс 140 тексеріс жүргізді, анықталған бұзушылықтарды жою қажеттілігі туралы 113 ұйғарым берілді. Объектілерді пайдалануға қабылдаудың 1263 актісі және құрылыс-монтаждау жұмыстарының басталғаны туралы 1548 хабарлама қаралды.
Басқарма 137 құрылыс субъектісіне қатысты әкімшілік ықпал ету шараларын қабылдады. Жобаға және құрылыс сапасына сәйкес келмегені үшін 22 қосалқы ұйым және техникалық қадағалауды жүзеге асыратын 5 тұлға жауапкершілікке тартылды. Жобалық және рұқсат құжаттарының жоқтығы үшін 45 құрылыс субъектісі де осындай тәртіпке жауап берді. Жалпы, 2024 жылы басқарма 42 миллион теңгеден астам сомаға әкімшілік айыппұл салды. 44 әкімшілік іс соттарға қарау үшін жіберілді.
Басқарма құрылыс саласында лицензиялау және аккредиттеу бойынша 5 мемлекеттік қызмет көрсетеді, сондай-ақ, жобаларға сараптама жасауды және ғимараттар мен құрылыстарды техникалық тексеруді, авторлық, техникалық қадағалауларды жүзеге асыруға сарапшыларды аттестаттауды жүргізеді.
2024 жылы жобалық, іздестіру қызметіне, сондай-ақ, құрылыс-монтаж жұмыстарына 148 лицензия берілді және қайта ресімделді. Сараптамалық жұмыстар мен техникалық, авторлық қадағалау, ғимараттар мен құрылыстарды техникалық тексеру, сондай-ақ, жобаларды сараптау сияқты инжинирингтік қызметтерді жүзеге асыру құқығына сарапшының 53 аттестаты берілді және қайта ресімделді. Есепті кезеңде жобаларды басқару жөніндегі 2 ұйым автоматты режимде аккредиттелген. Біліктілік талаптарына, сондай-ақ, мемлекеттік қызмет стандартына сәйкес келмеуіне байланысты 99 өтініш берушіге, оның ішінде 20-сына лицензиялау бойынша, 79-ына аттестаттау бойынша мемлекеттік қызмет көрсетуден бас тартылды.
Тапсырыс берушілердің мердігерлік ұйымдардың жұмысына бақылауды күшейту және соған негіздер болған жағдайда қажетті әкімшілік-құқықтық шаралар қабылдау үшін мемлекеттік сәулет-құрылыс бақылау басқармасын уақытылы хабардар етуі маңызды. Ағымдағы мәселелерді тиімді шешу үшін заңсыз құрылысқа үнемі мониторинг жүргізу, мұндай фактілер анықталған жағдайда тиісті шаралар қабылдау үшін Ақмола облысының МСҚБ басқармасына дереу ақпарат жіберу қажет. Сондай-ақ, құрылыс процесінде мердігерлік ұйымдардың ұйымдастырушылық-технологиялық және жобалау құжаттарын сақтауына бақылауды күшейту; Аяқталмаған жұмыстармен немесе бекітілген жобалау-сметалық құжаттамадан ауытқулармен объектілерді қабылдау мүмкіндігін болдырмау қажет. Сондай-ақ, сапасыз жобалардың бекітілуіне жол бермеу керек.
Жобалау-сметалық құжаттаманы әзірлеу және бекіту кезінде, сондай-ақ, объектілерді кейін пайдалануға қабылдау кезінде «халықтың аз қозғалатын топтары үшін ғимараттар мен құрылыстардың қолжетімділігін» реттейтін мемлекетаралық құрылыс нормаларының талаптарын сақтауды қамтамасыз ету қажет.
Құрылыс секторы мемлекеттің дамуына ықпал ететін негізгі факторлардың бірі бола отырып, ел экономикасында шешуші рөл атқарады. Ақмола облысының мемлекеттік сәулет-құрылыс бақылау басқармасы азаматтардың құқықтарын қорғауға, олардың өмір сүруі үшін қолайлы және қауіпсіз орта құруға, сондай-ақ, саладағы нормативтер мен стандарттардың сақталуын қамтамасыз ете отырып, құрылыс саласындағы мемлекеттік мүдделерді ескеруге алда да барынша ықпал ете беретін болады.
Бахыдбек ОСПАНБЕКОВ,
Ақмола облысы мемлекеттік сәулет-құрылыс
бақылау басқармасының басшысы.
9 Total Views , 1 Views Today
