Салауатты өмір салты
Қысқы спорт түрлеріне бейім Сандықтау ауданында спорт саласы жақсы дамуда. Ол үшін оқу орындарында спорттық құрал-жабдықтарды жаңарту жұмыстары жалғасып, сондай-ақ, жаңа спорт нысандарының құрылысы жүргізілуде.
Жергілікті әкімдіктің мәліметінше, аудан халқының жартысына жуығы жүйелі түрде дене шынықтырумен және спортпен айналысады. Тек өткен жылдың өзінде ауданнан бір спорт шебері, 15 спорт шеберіне үміткер, бірінші разрядты 5 спортшы және екінші, үшінші разрядты 95 спортшы шықты.
– Облыстық бюджеттен аудан орталығы Балкашинодағы шаңғы-роллер трассасының күрделі жөндеу жұмыстарына қаржы бөлінді. Сондай-ақ, көпфункционалды спорт алаңдарын орнатуға және жабық хоккей кортының құрылысына бюджеттік өтінімдер берілді, – дейді аудан әкімінің орынбасары Сәуле Жайылғанова.
Қазіргі таңда ауданда «Болашақ» спорт-сауықтыру кешені жұмыс істейді. Онда футзал, жүзу, қолмен күрес, айкидо, волейбол, баскетбол және фитнес жаттығулары бойынша спорттық секциялар бар. Ал, халықты жүйелі түрде дене шынықтыруға және спортқа тартумен айналысатын негізгі спорт ұйымы, ол Сандықтау мамандандырылған балалар мен жасөспірімдер спорт мектебі. Бұл мектепте 760 оқушы 8 спорт түрімен айналысады. Соның ішінде 1988 жылғы Қысқы Олимпиада ойындарының күміс жүлдегері Владимир Сахнов сияқты саңлақ спортшылар шыққан шаңғы спорты айтарлықтай басымдыққа ие болып келеді.
«Арқа ажарының» өз ақпараты.
Сандықтау ауданы.
5 Total Views , 1 Views Today
