Біржан сал ауданында жастар арасында «Таза Қазақстан» акциясы аясында «Сохраним природу для будущих поколений» тақырыбында экологиялық шара ұйымдастырылды. Бұл бастаманың негізгі мақсаты – жастарды қоршаған ортаны қорғауға, табиғатқа қамқорлық танытуға баулу және экологиялық мәдениетті қалыптастыру.
Іс-шара дөңгелек үстел форматында өтіп, жастарға өз жобаларын таныстыруға және экологиялық мәселелерді талқылауға мүмкіндік берді. Шараны аудан әкімінің орынбасары Ахметова Орынбасар Теңдікқызы ашып, Мемлекет басшысы Қасым-Жомарт Тоқаевтың аумақтарды абаттандыру мен көгалдандыру жөніндегі тапсырмаларының орындалуы туралы баяндады. Ол аудан көлемінде жүзеге асырылып жатқан экологиялық жобалар мен шаралар жайында мәлімет беріп, жастарды белсенді болуға шақырды.
«Аманат» партиясы филиалының атқарушы хатшысы Сағдат Байманов экологиялық мәселелердің өзектілігін атап өтіп, халық арасында кең қолдауға ие болған ағаш отырғызу акциялары мен қалдықтарды бөлек жинау бағдарламалары туралы айтты. Сонымен қатар, экологиялық білім беруді дамыту бағытындағы атқарылып жатқан жұмыстарға тоқталды. Оның айтуынша, мектептер мен жоғары оқу орындарында экологиялық білім беру деңгейі артқан, бұл өз кезегінде жас ұрпақты табиғатты аялауға және қоршаған ортаны қорғауға тәрбиелейді.
«Таза қоршаған орта – халық денсаулығының кепілі. Табиғатты аялау оның байлығын болашақ ұрпақ үшін сақтауға мүмкіндік береді. 2024 жылдың жазы – «Таза Қазақстан» экологиялық бастамасының тарихындағы тағы бір жарқын кезең болды. Ел бойынша мыңдаған адам ортақ үйімізді таза әрі қауіпсіз ету үшін күш біріктірді», – деді аудандық ішкі саясат бөлімінің басшысы Миргүл Аяғанова.
Дәстүр бойынша жаз мезгілінде аумақтарды қоқыстан тазарту, су айдындарын қалпына келтіру және көгалдандыруға бағытталған көптеген сенбіліктер өткізілді. «Таза Қазақстан» республикалық акциясы бүгінде жалпыхалықтық эко-челленджге айналып, түрлі мекеме қызметкерлері, жастар мен еріктілер белсенді түрде қатысып келеді.
Жастар ресурстық орталығының әдіскері Гүлден Омарова «Таза Қазақстан» акциясы аясында атқарылған жұмыстар туралы баяндама жасады. Оның айтуынша, соңғы жылдары жастар арасында экологиялық қозғалыстарға деген қызығушылық артып, қоршаған ортаны қорғауға бағытталған жобалар саны көбейген.
«Таза Қазақстан» экологиялық акциясы аясындағы дөңгелек үстел экология саласындағы өзекті мәселелерді талқылауға мүмкіндік беріп, қоршаған ортаны қорғау үшін әртүрлі сала мамандарының, қоғам белсенділері мен жастардың бірлескен әрекет етуінің маңыздылығын тағы да дәлелдеді. Бұл бастама еліміздегі экологиялық мәдениетті қалыптастыруға үлкен үлес қосып, табиғатты қорғауға деген жауапкершілік пен ұжымдық әрекеттің күшеюіне ықпал етеді.
15 Total Views , 1 Views Today
