1 наурыз – Алғыс айту күні
сол үшін мекеме басшылығына алғысымыз шексіз дейді мұнда тұратындар
Елімізде 2016 жылдан бастап 1 наурыз Алғыс айту күні ретінде аталып өтілуде. Осы мереке қарсаңында Макинка ауылында орналасқан «Мейірім» әлеуметтік қызмет көрсету орталығында тұратын жалғызбасты қарттармен тілдесіп, орталықтың жұмысымен таныстық. Ондағылар облыстық «Арқа ажары» газеті арқылы өздеріне жасалып жатқан қамқорлық үшін шын көңілден ризашылығын айтып, алғысын жеткізгісі келеді. Орталықта барлығы 76 адам тұрады. Олар 9 ұлттың өкілі. Атап айтқанда, 11 қазақ, 44 орыс, 3 украин, 8 беларус, 2 татар, 4 неміс, 2 поляк және бір-бірден мордва мен чуваш ұлтының өкілдері бір баспана астында тату-тәтті ғұмыр кешуде. Қартайған шағында қамқорлық пен жылулықтан мұқтаждық көрген қарттар мен мүмкіндігі шектеулі жандар осы «Мейірімнен» мейірім тауыпты. Мұнда оларға қажетті барлық жағдай жасалған. Оларға бес уақыт ыстық тамақ беріліп, жатын орынмен қоса, әлеуметтік, медициналық, психологиялық қызметтер көрсетіледі. Сонымен қатар, мекеме қабырғасында еңбек терапиясы кабинеті, кітапхана, компьютерлік сынып, акт залы, психологиялық түсіру бөлмесі, медициналық емшара кабинеті, спорт залы, тігін және ағаш ұстасы шеберханалары жұмыс істейді.
Мекеме директоры Амангелді Қожахметтің айтуынша, бұл орын барлығы 82 адамға әлеуметтік қызмет көрсетуге лайықталған. Жұмыс қарттардың денсаулық жағдайын, жас, физикалық және психологиялық ерекшеліктерін ескере отырып жүргізіледі. Мұндағылар киім және аяқ киім, ішкиім, төсек-орын, жеке гигиеналық заттармен қамтамасыз етілген.
– Қызмет алушыларға білікті медициналық көмек көрсетіп, оларды дәрі-дәрмекпен қамтамасыз етеміз. Мұндағы қарттар мен мүгедектерге динамикалық және диспансерлік бақылау жүргізіліп, емдеу, оңалту шаралары қолданылады. Орталықтың дәрігерлері тұрғылықты азаматтардың өмірін барынша ұзарту үшін олардың денсаулық жағдайын бақылауда ұстауға мән береді,–дейді мекеме директоры.
Орталық компьютермен жабдықталғандықтан, ғаламторға да әрдайым қолжетімді. Арнайы компьютерлік сыныпта қызмет алушылар қажетті ақпаратты тауып, фильмдер мен видео-бейнелерді көре алады, онлайн сабақтарға қатысып, жаңа дағдыларды игереді. Қызмет алушылардың жүріп-тұруына пандустар, тактильді тірекжол, қоңырау түймелері орнатылған.
Біз өз кезегімізде орталықтағы еңбек терапеясы кабинетіндегі «Умелица» үйірмесінің жұмысына назар аудардық. Мұнда тұратын қарттар мен мүмкіндігі шектеулі жандардың көпшілігі бос уақыттарын осы жерде өткізеді екен. Онда олар қолданбалы өнердің жаңа әдіс-тәсілдерін меңгеріп, қолы икемге келетіндері балшық, гипс, киіз, эпоксидті шайырмен жұмыс істеп, әртүрлі панельдер, пішіндер жасайды екен.
– Біз бұл жерде күні ұзақ қарап отырмаймыз. Тоқыма тоқып, тігін тігумен айналысамыз. Гүл, өсімдік өсіру үшін жылыжайда жұмыс істейміз. Қарындаштар мен акварельдерді, ермексазды қолданып сурет салатындар да бар арамызда. Түйме қадау, жыртықты бүтіндеу, жіптерді орау, тастарды тізу сияқты жұмыстармен шұғылданамыз. Уақытымызды көңілді өткізуге жағдай жасап жатқан орталық басшылығына, бізді қамқорлығына алып, бар қажетімізді өтеп беріп жатқан мемлекетімізге, облыс әкімдігіне, Біржан сал ауданы әкімдігіне алғыс айтамыз, – дейді орталық тұрғыны Тамара Шалаева.
Тамара Ивановна 1941 жылы Ақмола облысы Есіл ауданында дүниеге келіпті. Жеті сыныпты бітіріп, балабақшада күтуші және элеваторда жүк тиеуші болып жұмыс істеген апайдың жас кезінде үлкен отбасы болғанымен, өкінішке орай, қартайған шағында жалғыз қалыпты.
– Мен мұнда 12 жыл тұрып келемін және осында келгеніме өкінбеймін. Бұл жер кәдімгі үйіміз сияқты. Бізге қызмет ететін қыздар өз істерін жақсы біледі. Олар тырнақтарымызды алып, шашымызды қиып, жуындырады, түскі асқа шақырады. Қарт адамдарға қамқорлық жасайды. Біз өз жағдайымызға байланысты туыстарымыздың арасында өмір сүре алмағанымызбен, басқа бір мейірімді отбасын таптық деп айта аламын. Сол үшін, біздің осы жақсы жағдайымыз үшін мемлекетімізге үлкен рахмет айтқым келеді,–деп Тамара апай өз сөзінде тағы да жақсы жандарға алғыс айтумен болды.
Ал, Анастасия Федоровна Малашенко 1957 жылы тамыз айының 28-інде Беларусь Республикасында дүниеге келіпті. Ата-анасы сол кездегі Володар ауданы Кирилловка ауылы «Каменноброд» совхозындағы тың жерлерді игеруге келіпті. Осы ауылда мектепті бітіріп, арнайы орта білім алған Анастасияның барлық еңбек жолы совхозда өтіпті. Тұрмысқа шығып, қызды болған ол 2000 жылы Щучинск қаласына көшіп, туыстары Ресейге көшіп кеткесін, жалғыз қалыпты. Содан инсульт алып, өз-өзін күте алмаған соң, әлеуметтік қызмет көрсету орталығынан көмек сұрауына тура келген.
– Мен орталыққа 2024 жылдың қазан айында түстім. Осы уақыт бойы орталық туралы тек жақсы сөздер ғана айта аламын. Мұнда бізді кішкентай балалар сияқты күтеді, қызметкерлер өте мұқият және мейірімді. Олар өте дәмді тамақтармен тамақтандырады. Мен ұжымға қажырлы еңбегі, шыдамдылығы және бізбен ортақ тіл табыса білгені үшін алғыс айтамын!–дейді Анастасия.
Осында 32 жылдан бері тұрып жатқан Борис Владимирович Шихириннің да алғысы шексіз әрі ұшан-теңіз. Ол өзі сияқты адамдарға жарқын өмір сүруге мүмкіндік беріп отырған барша жақсы жандарға, мемлекет саясатына, Президент Қасым-Жомарт Тоқаевқа шексіз ризашылығын жеткізеді.
– Қиын-қыстау кезде шет жақтан ауып келген өзге ұлт өкілдерін бауырына басқан қазақ халқының мейірбандығы мен бауырмашылдығын еш ұмытпаймыз. Елімізде қаншама ұлт өкілдері еш қысым көрмей, емін-еркін ғұмыр кешіп жатыр. Бұл дегеніңіз, қазақтың кең пейілінің көрінісі, қолындағы барымен бөлісетін жомарттығының белгісі. Біз мұны ескеруіміз керек, –дейді Борис ақсақал өзін мереке туралы әңгімеге тартқанымызда.
Сонымен қатар, директордың орынбасары Евгения Андреевна мұндағы қарттар мен мүмкіндігі шектеулі жандардың мәдени қызметке тартылатындығын айтады. Олар мүмкіндігінше облыстық, аудандық мәдени шараларға да қатысатын көрінеді. Араларында ән айтып, аспапта ойнап, түрлі байқауларға қатысып, бағын сынайтындары да бар екен. Мекеменің акт залында әр мереке сайын концерттер ұйымдастырылып, ерекше жарқын көңіл-күй орнап, бір жасап қаламыз дейді мұндағылар.
Спорт та денсаулық кепілі. Орталықта өз денсаулығын осы спорт арқылы қалыптастыратындардың да қатары баршылық. Олар да түрлі спорттық жарыстардан қалыс қалмай, өз командасының абыройы үшін сынға түсіп тұрады. Мәселен, жақында Степняк қаласында өткен шахмат-дойбы турнирінде Ирина Лахтаева 1 орынды жеңіп алса, дойбыдан Иван Миронов үшінші орынды, тоғызқұмалақтан Александр Тарасенков бірінші орынды және дойбыдан 3 орынды иеленген. Сондай-ақ, осы орталық тұрғындарынан құралған спорттық команда жыл сайын әлеуметтік қызмет алушылар арасында өтетін спартакиядаға қатысып тұрады. Өткен жылы орталық командасы жүлделі бірінші орынды жеңіп алыпты.
Майра ҚУАНЫШҚЫЗЫ,
«Арқа ажарының» өз тілшісі.
Біржан сал ауданы.
7 Total Views , 1 Views Today
