Таяқынға — тосқауыл
Ақмола облысының әкімі Марат Ахметжановтың тапсырмасы бойынша облыс әкімінің бірінші орынбасары Елдос Рамазанов Целиноград ауданы мен Қосшы қаласындағы елді мекендерге барып, су тасқыны жағдайын бақылау мақсатында мониторинг жүргізді.
Сапар барысында ол Целиноград ауданының әкімі Дарын Сабырғали және ауыл әкімдерімен бірге Қоянды және Талапкер ауылдарындағы су тасқынына қарсы іс-шаралардың барысымен танысты. Қорғаныс құрылыстарын нығайту, оның ішінде арналарды, дамбалар мен су бұру жүйелерін орнату және күшейту жұмыстары жүргізіліп жатқан учаскелер қаралды. Барлық іс-шаралар бұған дейін бекітілген Су тасқынына дайындық және оны апатсыз өткізу жоспарына сәйкес жүзеге асырылуда.
Сонымен қатар, Елдос Рамазанов Қосшы қаласындағы су басу қаупі жоғары учаскелерді аралады. Тайтөбе ауылында жасанды дамба тексеріліп, Қосшы қаласы төтенше жағдай бөлімінің бастығы қорғаныс құрылыстарының қазіргі жағдайы, Самарқан су қоймасынан судың болжамды ағызылуы және кешенді су тасқынына қарсы шаралардың орындалуы туралы баяндады. Қазіргі уақытта су басу қаупі тіркелген жоқ.
Сондай-ақ, облыс әкімінің бірінші орынбасары Қосшы қаласының 19-ыншы және 20-сыншы шағын аудандарын аралап, қала әкімінің орынбасары Н.А.Садыров жүргізіліп жатқан су тасқынына қарсы шаралар туралы баяндады. Сапар қорытындысы бойынша қар шығару мен еріген қар суларын уақытылы сору жұмыстарын жалғастыру туралы тапсырмалар берілді.
Өңірдегі су тасқынына қарсы іс-шаралар жергілікті атқарушы органдардың тұрақты бақылауында ұсталуда.
Ақмола облысы әкімінің баспасөз қызметі.
Целиноград ауданы.
