Ақмола облысының әкімі Марат Ахметжанов Жібек Жолы ауылындағы су тасқынынан қорғауға арналған қорғаныс бекетінің құрылыс барысын тексерді. Ұзындығы 6,2 шақырымды құрайтын бұл нысан елді мекенді су басу қаупінен сақтау мақсатында салынып жатыр.
Қазіргі уақытта құрылыс жұмыстары бекітілген жоспарға сәйкес жүргізілуде. Барлық жауапты мекемелер бекет сапасын қатаң бақылауда ұстап отыр. Бүгінде нысан көктемгі су тасқыны кезеңіне дайын.
Облыс әкімі су басудың алдын алу шараларының маңыздылығын атап өтіп, құрылыс сапасының жоғары болуын талап етті.
– Бұл тоспа – тұрғындардың қауіпсіздігін қамтамасыз ететін стратегиялық маңызды нысан. Құрылыс сапасы ең жоғары талаптарға сай болуы тиіс. Барлық жауапты құрылымдар жұмыс қарқынын сақтап, жобаны белгіленген мерзімде аяқтауы қажет, – деді Марат Ахметжанов.
Сондай-ақ, өңір басшысы аудан әкіміне елді мекендерден қарды жедел шығару жөнінде тапсырма берді. Өйткені, қардың шамадан тыс жиналуы елді мекендердің су астында қалу қаупін арттыратыны белгілі.
Ақмола облысы әкімінің баспасөз қызметі.
Аршалы ауданы.
