Қазақстан Республикасы Премьер-Министрінің орынбасары Ермек Көшербаевтың, Ақмола облысының әкімі Марат Ахметжановтың, Мәдениет және ақпарат вице-министрі Евгений Кочетовтың және Қамқоршылық кеңесінің төрағасы Алмаз Шарманның қатысуымен Қосшы қаласында республикамыздағы алғашқы көпфункционалды комьюнити-орталық келушілерге өз есігін айқара ашты.
Болат Өтемұратов қорының бастамасымен жүзеге асырылған бұл халықаралық стандарттарға сай салынған ауқымды мәдени-спорттық кешен қала инфрақұрылымының дамуына қосылған елеулі үлес болып табылады. Жалпы аумағы 8,5 мың шаршы метрді құрайтын орталық бір уақытта 1000 адамды қабылдай алады. Құны 20 миллион доллар болатын жоба қала балансына тегін берілді.
Өңір басшысы Қор басшылығына ризашылығын білдіріп, жаңа мәдени-демалыс орталығының Қосшы қаласының дамуында алатын зор маңызын атап өтті.
– Қала мәртебесі берілгеніне небәрі төрт жыл өтсе де, Қосшыда әлеуметтік нысандарды салу мен жаңғырту қарқынды жүргізіліп жатыр. Бүгін біз елімізде алғаш рет халықаралық стандарттарға сай көпфункционалды кешеннің ашылуына куә болдық. Бұл жоба Мемлекет басшысы Қасым-Жомарт Кемелұлы Тоқаевтың тапсырмасы аясында Болат Өтемұратов Қорының қолдауымен жүзеге асырылды. Мұнда балалар мен ересектер үшін барлық заманауи жағдай жасалған, – деді облыс әкімі Марат Ахметжанов.
Орталық спорттық, білім беру және мәдени-демалыс аймақтарын біріктіреді. Мұнда 233 орындық кинотеатр, 300 адамға арналған лекция залы, көрме және конференция залдары, студиялар, коворкинг пен оқу залы бар кітапхана қарастырылған. Сондай-ақ, аумағында спорт алаңдары, воркаут аймақтары мен серуенге арналған аллея орналасқан. Балалар үшін робототехника, шахмат, хореография және қолданбалы өнер үйірмелері жұмыс істейді. Ал, ересектерге арналған ыңғайлы жұмыс, демалыс және қарым-қатынас кеңістігі қарастырылған. Кіру тегін, ал секциялар мен үйірмелер халыққа қолжетімді бағамен ұсынылады.
– Біз жылдар бойы мемлекетке қолдау көрсетіп, әр қазақстандық үшін қолжетімді, заманауи әрі жайлы инфрақұрылым қалыптастыруға үлес қосып келеміз. Бұл жобада әлемдік тәжірибенің озық үлгілерін негізге алдық. Басты мақсатымыз орталыққа келген әр адамның өз әлеуетін іске асырып, Қосшыдағы өмір сапасын арттыруына мүмкіндік жасау, – деді Қамқоршылық кеңесінің төрағасы Алмаз Шарман.
Комьюнити-орталық – бұл білім алу, шығармашылық және белсенді демалыс үшін ашық әрі қолжетімді кеңістік ұсынатын заманауи халықаралық формат. Мұндай орталықтар жергілікті қауымдастықтың дамуына және әлеуметтік байланыстардың нығаюына ықпал етеді.
Айта кетейік, бұл – Болат Өтемұратов Қорының Қосшы қаласына тарту еткен екінші әлеуметтік нысаны. Бұған дейін 2023 жылдың қыркүйегінде, Қор қалаға 1500 орындық заманауи мектепті сыйға тартқан болатын. Сонымен қатар Қосшыда демеушілік қаражат есебінен заманауи көпсалалы аурухана да салынып жатыр.
Ақмола облысы әкімінің баспасөз қызметі.
Қосшы қаласы.
8 Total Views , 1 Views Today
