Игі шара
Көкшетау қалалық орталық балалар және жасөспірімдер үлгілі кітапханасында «Ана – гүл, ана – өмір шуағы» атты мерекелік бағдарлама іске асырылды.
Бұл іс-шараға «Парасат» білім беру орталығының оқушылары мен кітапхана оқырмандары белсене қатысты. Кітапханашылар дайындаған бағдарлама әрбір оқырманның жүрегіне жол тауып, балалар көңіліне жылу таратты, балалардың аналарына деген сүйіспеншілігі мен махаббатын арттыра түсті және әйел атаулыны қашанда құрметтеудің маңыздылығын түсіндірді.
«Бізді сүйетұғын, күйетұғын, әрқашан қамымызды ойлап жүретұғын абзал жанды адам, бұл – ана. Қаншама байлық иесі болсаң да, әлемге әйгілі адам болсаң да, анаңды, оның саған жасаған жақсылығын ұмытпау – сенің өмір бойындағы борышың» деген екен кезінде Алаш ардақтысы Міржақып Дулатов бабамыз. Иә, ана – барлық өмірдің бастауы. Адам бойындағы барлық асыл қасиет күннің нұрынан, ананың ақ сүтінен бойымызға сіңеді. Ана – ұлы адам, құдіретті жан. Әйел-Ана бір қолымен бесікті тербетсе, екінші қолымен әлемді тербетіп, отбасының ұйытқысы болып, берекесін келтіреді.
Мерекелік бағдарлама барысында балалар өз аналарына деген жылы лебіздерін айтып, мерекелерімен құттықтады. Әрқайсысы өз аналарының бойындағы асыл қасиеттерін әдемі жүрекжарды сөздерімен жеткізіп, перзенттік парыздары туралы ойларымен бөлісті.
Осы шара арқылы оқырмандарға арнайы ойындар ұйымдастырылып, мерекелік көңіл-күй сыйладық деп ойлаймыз. Сондай-ақ, шара барысында кітапхана қорындағы белгілі ақын-жазушылардың қаламынан туған ардақты аналар мен нәзік жанды әйелдерге арналған таңдамалы шығармалар да көрмеге қойылып, жиналған қауым назарына ұсынылды. Солардың ішінен ақын апаларымыз М.Хакімжанова, З.Ахметова, Ф.Оңғарсынованың да шығармалары көрме төрінен орын алды. Қыздарға арналған кітаптар да жасөспірім оқырмандардың қызығушылығын тудырды.
Оқырмандар көрмені тамашалау барысында аналар туралы қазақ және орыс тілдерінде жарық көрген әдеби-поэзиялық жыр-жинақтармен де танысты. Мұның барлығы болашақ ұрпақты имандылық, адалдық, шыншылдық сияқты адамгершілік асыл қасиеттерге бойлату мақсатында жасалды.
Жұмақтың кілті ананың табанының астында екенін ұмытпайық, анаға деген махаббатымыз, сыйластығымыз шексіз болсын! Осыған үндейтін тамаша бір тағылым жолын оқырмандарымыз біз, кітапхана қызметкерлері ұйымдастырған әсерлі кештен тапқандай болды.
Бақытгүл МАЙДАНҚЫЗЫ,
қаласының орталық балалар және жасөспірімдер
үлгілі кітапханасының меңгерушісі.
3 Total Views , 1 Views Today
