Кәсіпкерлік
Ақмола облысы кәсіпкерлер палатасының агроөнеркәсіп кешені және тамақ өнеркәсібі кеңесінің кезекті отырысында заңды және жеке тұлғалардың меншігіндегі жер учаскелерінің шекті мөлшері туралы мәселе қаралып, оны шешу жолдары талқыланды.
Белгілі болғанындай, үлкен алаңдары бар және жер учаскелерін тиімді пайдаланатын жер пайдаланушылар әкімдіктердің жалдау мерзімін ұзартуды қарауы кезінде қиындықтарға тап болуы мүмкін. Мысалы, облыс аудандарының бірінде ЖШС 600 гектарға жуық жер учаскесін сәтті игерген. Серіктестікке жерді бұрын жергілікті атқарушы органдар берген. Онда ауыл шаруашылығы дақылдары өсіріледі, суару бойынша жаңа жобаны іске асыру үшін инвестиция тартылуда. Алайда, жергілікті әкімдік Үкіметтің 2023 жылғы Қаулысына сілтеме жасай отырып, жерді жалға беруді ұзартуға келіспеген, себебі, аудандағы бір субъектінің максималды ауданы белгіленген шектен аспауы керек. Заңды тұлғалардың ауданы жергілікті жағдайлар мен ерекшеліктерді ескере отырып, 51 мың гектардан, шаруа қожалықтарында 35 мың гектардан аспауға тиіс.
–Облыста жер учаскелерінің мөлшері республикалық деңгейден төмен болып белгіленді, яғни, фермерлік шаруашылықтар үшін небары 7290 гектар, ал, ауыл шаруашылығы кәсіпорындары үшін 48 600 гектар. Жер иелері үшін жер учаскелерін жалға беру мерзімін ұзартудан бас тарту қаупі басым. Оларға жер 2023 жылы заңнамаға түзетулер енгізілгенге дейін берілді. Естеріңізде болса, аталған мәселеден басқа, ДДҰ тарапынан адал агроқұрылымдардан жер алу мәселесі де бар. Өткен жылдары соттарға мемлекеттік органдардың агробизнеске заңдардағы қайшылықтар мен учаскелердің дұрыс ресімделмеуіне байланысты жерді жалдау шарттарын жарамсыз деп тану туралы 178 талап түсті. Сонымен қатар, осы түзетулермен біз тағы бір сот процесіне тап болу қаупі бар, – деді Өңірлік палата директорының орынбасары Расул Сыздықов.
Бүгінгі таңда Премьер-министрдің орынбасары Серік Жұманғарин Ауыл шаруашылығы министрлігіне ауыл шаруашылығы мақсатындағы жер учаскелерінің шекті мөлшерін қайта қарауды тапсырды.
Облыстық ауыл шаруашылығы жер қатынастары басқармасының басшысы Нұрбек Бадырақовтың айтуынша, Ақмола облысының әкімдігі осы жылдың 5 ақпанында қолданыстағы нормативтерді сақтау туралы ұсыныстар енгізді. Сонымен қатар, Жақсы, Сандықтау аудандары мен Степногорск қаласының жергілікті атқарушы органдары рұқсат етілген ең жоғары мөлшердің ауданын ұлғайтуды ұсынды.
– Жоғарыда айтылғандарға байланысты жақын арада жергілікті және республикалық деңгейде белгіленген шекті өлшемдерді қайта қарау бойынша шешімдер қабылдау кезінде көрсетілген мән-жайларды ескеруді сұраймыз, – деп толықтырды өз сөзін бұл ретте, Расул Сыздықов.
Кеңес отырысының қорытындысы бойынша Ақмола облысының Ауыл шаруашылығы және жер қатынастары басқармасына Ауыл шаруашылығы министрлігінің атына ауыл шаруашылығы жерлері мөлшерінің белгіленген шегін ұлғайту туралы хатқа бастамашылық жасау ұсынылды.
Сондай-ақ, салалық ведомствоға бұл мәселені облыстық мәслихаттың кезектен тыс отырысына шығару ұсынылды.
«Арқа ажарының» өз ақпараты.
