Жәрмеңке
Көкшетаудағы Тәуелсіздік алаңында биылғы жылдың алғашқы ауыл шаруашылығы жәрмеңкесі өтіп, қала тұрғындары мен қонақтары азық-түлік өнімдерін нарық бағасынан арзанға сатып алу мүмкіндігіне ие болды.
Жәрмеңкеде ет және сүт өнімдері, бал, балық, ұн, көкөністер, жарма, кондитерлік тағамдар, барлығы 70-тен астам өнім түрі қала тұрғындары мен қонақтарына нарықтағыдан 10-15 пайыз төмен бағада ұсынылды. Ал, жалпы бұл өнімдердің салмағы 82 тоннаны құрады.
Жәрмеңке аумағында 45 павильон құрылып, әрқайсысы бірінде – ет, екіншісінде – сүт өнімдері, үшіншісінде – ұн, ал, төртіншісінде – көкөністер дегендей, белгілі бір өнімге арналды.
–Ораза айт мерекесі қарсаңында облыс орталығында биылға алғашқы ауыл шаруашылығы жәрмеңкесін ұйымдастырдық. Бұл – әр отбасы үшін қуанышты жай. Жәрмеңке – халыққа қажетті азық-түлікті тиімді бағада сатып алуға, ал, ауыл шаруашылығы тауар өндірушілеріне өнімдерін тиімді өткізуге де тамаша мүмкіндік, – деді облыс әкімі Марат Ахметжанов.
Жәрмеңкеге Ақкөл, Бурабай, Бұланды, Зеренді, Шортанды, Сандықтау, Біржан сал аудандарының, сондай-ақ, Көкшетау, Степногорск қалалары мен «СПК Көкше» акционерлік қоғамының өнім өндірушілері қатысты.
–Жәрмеңке тек сауда орны емес, ол – бірлік пен берекенің көрінісі. Адамдар азық-түлік сатып алып қана қоймай, концерт тамашалап, бір-бірімен қауышып жатады. Оның үстіне, мұндай шараның қасиетті Рамазан айының соңғы күні ұйымдастырылуы ерекше мәнге ие. Бұл – көктемнің, молшылық пен мейірімнің жаршысы іспетті, – дейді қала тұрғыны Әлия Ахетова.
Жәрмеңкеде халыққа өз өнімдерін ұсынғандардың арасында тәжірибелі кәсіпкерлер де бар. Солардың бірі – Біржан сал ауданындағы «Шәріпов» шаруа қожалығының өкілі Әлия Оразова.
– Біз мұндай шараға жыл сайын қатысамыз. Өзім осында қателеспесем, 13-інші рет келіп тұрмын. Біздің аудан, ең алдымен, сүт өнімдерімен танымал. Май, ірімшік, құрт, сүзбе, бәрін әкелдік. Әрине, етіміз де бар. Жәрмеңкеде сиыр еті өз сапасымен ерекшеленеді. Көпшілік бізді таниды, арнайы іздеп келетіндер де аз емес, – дейді ол.
Жәрмеңке тек азық-түлікпен ғана емес, мәдени шаралармен де есте қалды. Сахна төрінде аудандардан келген өнерпаздар ән шырқап, ұлттық билер орындалды. Жалпы, бұл күні 100 мың данадан астам жұмыртқа, 30 тонна ет өнімдері, 16 тонна көкөніс, 2,6 мың литр күнбағыс майы сатылымға шығарылды.
Ұйымдастырушылар алда да мұндай жәрмеңкелердің тұрақты түрде өтетінін айтты.
– Жәрмеңкенің өтетін күндері туралы алдын ала хабарлап отырамыз. Басты мақсат – жергілікті аграршыларды қолдап, тұрғындарды сапалы әрі қолжетімді азық-түлікпен қамтамасыз ету, – делінген ұйымдастырушылар ақпаратында.
Ақмола облысы әкімінің баспасөз қызметі.
сурет: www.gov.kz
