Тасқынға – тосқауыл
Көктемгі еріген қар суының зардапсыз жер қойнына сіңіп, дала төсінің кеуіп, құрғауын бәріміз де асыға күтіп отырған жайымыз бар. Дегенмен, бұл кезеңнің халыққа жайлы өтуі үшін қарап отыруға болмайды.
Мәселен, Бұланды ауданында соңғы екі тәулік ішінде 8 мың текше метрден астам қар шығарылды. Бұл жұмыстарға 40 жүк көлігі, 15 тиегіш, 3 экскаватор жұмылдырылды.
Макинск қаласындағы кәсіпорын-ұйымдардың күшімен арықтар мен су өткізу құрылымдарын мұз бен қардан тазарту мақсатында сенбіліктер ұйымдастырылды. Барлығы 5 сенбілікте С.Сейфуллин, М.Яглинский, Ш.Уәлиханов көшелерінде 6,5 шақырым арық жүйесі тазартылды.
Аудан әкімі Ардақ Смайыловтың айтуынша, қала осы мақсатта бірнеше секторларға бөлініп, қар шығару жұмыстарында техника саны көбейтіле түсті.
– Облыс әкімі Марат Ахметжановтың тапсырмасы бойынша қар шығару жұмыстарына баса мән берудеміз. 17 наурыздан бастап ауданда су тасқынына қарсы штаб жұмыс істеуде. Осылайша барлық күшті жұмылдыра отырып, қазіргі уақытта 150 мың текше метрден астам қар шығарылды. Бұл жұмыстардың бәрі тұрақты бақылауда, – дейді осы орайда, аудан әкімі.
Сонымен қатар, ауданда зейнеткерлердің, жалғызбасты азаматтардың және әлеуметтік нысандардың аумағын қардан тазарту жұмыстары да белсенді жүргізілуде.
Ақмола облысы әкімінің баспасөз қызметі.
2 Total Views , 1 Views Today
