Қасым-Жомарт Тоқаев:
Биыл Көкшетауда көпфункционалды спорт кешенінің құрылысы басталады. Бұл Қазақстанда теңдесі жоқ орталық болмақ. Осы жобаны арнаулы мемлекеттік қордан, яғни, заңсыз активтерді қайтару есебінен қаржыландыру керек. Үкіметке осы мәселені пысықтауды тапсырамын.
(Бурабай Ұлттық құрылтайының төртінші отырысында сөйлеген сөзінен. 14 наурыз, 2025 жыл).
Ақмола облысының әкімі Марат Ахметжанов облыс орталығындағы құрылыс алаңдарын аралап, жаңа әлеуметтік жобалардың іске асырылу барысымен танысты.
Жаңа көпфункционалды спорт кешені 1000 орынға лайықталған. Бұл екі қабатты, функционалды жертөлесі бар заманауи нысан болмақ. Қазіргі уақытта сыртқы инженерлік желілерді жүргізу жұмыстары аяқталып, металл конструкцияларды орнату және жертөле қабатының қабырғаларын қалау қолға алынған. Нысанды биылғы жылдың желтоқсан айында пайдалануға беру жоспарланып отыр.
– Бұл кешен еліміз үшін бірегей жоба болмақ. Оның маңыздылығын Мемлекет басшысы да Бурабайда өткен Ұлттық Құрылтай барысында атап өтті. Нысан қаладағы спорттық және мәдени мүмкіндіктерді кеңейтіп қана қоймай, жастардың дамуына үлкен серпін береді. Біз оның ашылуы облыс тұрғындарының салауатты өмір салтын ұстануына көп көмегін тигізеді деп сенеміз, – деді Марат Ахметжанов.
Өңір үшін стратегиялық маңызы зор тағы бір нысан – 630 төсек-орындық көпбейінді облыстық аурухана. Бұл жаңа медициналық орталық облыс және жақын маңдағы аймақтардың тұрғындары үшін медициналық қызметтердің қолжетімділігі мен сапасын айтарлықтай жақсартуға мүмкіндік береді.
Қазіргі уақытта нысанда жер және қада қағу жұмыстары аяқталды, іргетасы мен ғимарат қаңқасы орнатылуда, сондай-ақ топырақты тұрақтандыру шаралары да іске асырылды. Құрылыс жұмыстарының негізгі бөлігі 2025 жылдың соңына дейін аяқталып, ғимараттың жылыту контуры қалыптастырылады. Бұл қыста әрлеу жұмыстарын жалғастыруға мүмкіндік береді.
– Қазіргі таңда құрылыс алаңында 600-ге жуық маман инженерлер, құрылысшылар, техникалық қызметкерлер жұмыс істеп жатыр. Жұмыс бекітілген кестеге сай жүргізілуде. Құрылысты толық аяқтауды 2027 жылдың бірінші тоқсанына жоспарлап отырмыз, – деді жобаның бас инженері Игорь Растихин.
Сонымен қатар, өңір басшысы 500 орындық жалпы білім беретін мектептің құрылысымен танысты. Қазіргі таңда мұнда іргетас пен сыртқы инженерлік желілерді жүргізу жұмыстары аяқталуға жақын, жертөле және бірінші қабаттарының негізін құю жұмыстары жүріп жатыр. Жобаны жүзеге асырып жатқан мердігер ұйымның басшысы Талғат Хамитовтың айтуынша, инженерлік желілер бойынша барлық жұмыс толық орындалған. Мектеп 1 қыркүйекте оқушыларды қабылдауға дайын болады.
Сапар қорытындысы бойынша облыс әкімі барлық нысандардың белгіленген мерзімде аяқталуы тиіс екенін атап өтті.
– Көпфункционалды кешен, аурухана және мектеп – қала тұрғындары үшін аса қажетті инфрақұрылымдық нысандар. Біз құрылыс сапасы мен мерзімін қатаң бақылауда ұстаймыз, – деді Марат Ахметжанов.
Сонымен қатар, тұрғындардың өтініші бойынша өңір басшысы жаңа мектепке апаратын жолдың құрылыс жұмыстарымен танысты. Қазіргі уақытта мердігер ұйым жолдың барлық бөлігінде ірі түйіршікті асфальтбетонның төменгі қабатын төсеп, жаңбыр суына арналған арықтарды орнатқан. «АБК-Автодор» ЖШС-інің учаске басшысы Николай Метрофановтың айтуынша, жол құрылысын екі апта ішінде аяқтау жоспарланып отыр.
Ақмола облысы әкімінің баспасөз қызметі.
3 Total Views , 1 Views Today
