Көктемгі егіс — 2025
Целиноград ауданында биыл 260,4 мың гектар алқапқа тұқым себу жоспарлануда. Оның 216,3 мың гектары дәнді дақылдар, 23,8 мың гектары майлы және бұршақты дақылдар болса, 146 гектары картоп, 76 гектары көкөніс және 20,2 мың гектары жемшөп дақылдары.
Бүгінгі таңда ауданның ауыл шаруашылығы құрылымдары өздерін жаздық дәнді және дәнді-бұршақты дақылдардың тұқымымен толықтай қамтамасыз етті. Былтырғы күзгі дала жұмыстарынан бері 28 мың тоннадан астам тұқым, оның ішінде 161 тонна майлы дақылдар мен 638 тонна жемшөп дақылдарының тұқымы дайындалды. Аккредиттелген зертханаларда 2025 жылғы 26 наурыздағы жағдай бойынша 20 347 тонна дәнді дақылдар тұқымы тексерілді.
Ағымдағы жылы аудан шаруашылықтары 1882 тонна минералды тыңайтқыштар сатып алды. 700-ден астам трактордан тұратын ауыл шаруашылығы техникасы паркін, сондай-ақ, сепкіштер, соқалар, қопсытқыштар және басқа да қажетті жабдықтарды көктемгі егіске сақадай сай әзір ету жұмыстары жүргізілуде. Жыл басынан бері жаңадан 331,8 миллион теңгенің екі ауыл шаруашылығы техникасы сатып алынды. Өткен жылы қолда бар ауыл шаруашылығы техникалары паркі 50 техникамен жаңартылды. Бұл үшін 1,6 миллиард теңге қаржы жұмсалды.
Биылғы көктемгі егіс жұмыстарын жүргізу үшін ауыл шаруашылығы тауар өндірушілері 4137 тонна жанар-жағар май материалдарына 93 өтінім берген еді. Бұл бағытта да алдын ала дайындық жүргізіліп, «Каз-Шер және компания», «Petro Retail», «Арна» жанар-жағар май компаниясы» және «ОDS OIL» жауапкершілігі шектеулі серіктестіктері операторлар болып белгіленді.
Осы жылы да «Аграрлық кредиттік корпорация» АҚ, «КТ Целиноград» ЖШС, «Көкше» ӘКК» АҚ арқылы көктемгі егіс жұмыстарын жүргізу үшін ауыл шаруашылығы тауар өндірушілерін қаржыландыру «Кең Дала-2» бағдарламасы бойынша жылдық 5 пайызбен жалғасатын болады. «КТ Целиноград» ЖШС арқылы 3,2 миллиард теңгенің сомасына 20 фермерлік шаруашылықты қаржыландыру жоспарланған. Бұл қаражат жалпы 117,6 мың гектар алқапта егіс жұмыстарын жүргізуге мүмкіндік береді.
Міне, осындай уақытында қабылданған шаралар биылғы көктемгі егіс науқанын сәтті өткізуге және болашақ егін үшін берік негіз қалауға қолайлы жағдай туғызады деп күтілуде.
Ақмола облысы әкімінің баспасөз қызметі.
