Әкім – іс үстінде
Ақмола облысының әкімі Марат Ахметжанов Көкшетау қаласында реновация бағдарламасының орындалу барысын қадағалады.
Алдымен, реновация бағдарламасы аясында Быковский көшесінде салынып жатқан тұрғын үйлердің құрылысына зер салынды. Мұндағы 231 пәтерлік тұрғын кешенін қазан айының соңында тапсыру жоспарланған.
Сондай-ақ, өңір басшысы Саин көшесіндегі үйлерге барып, жергілікті тұрғындармен кездесті.
– Жаңа үйге көшіп баруға қазірдің өзінде дайынбыз. Құрылыс қарқынды жүріп жатқанын көріп, қуанып отырмыз, – деді бұл ретте, осы көшедегі 41-үйдің тұрғыны Евдокия Дельхман.
Марат Ахметжанов Вернадский көшесіндегі 11-үйдің жағдайын да назардан тыс қалдырмады. Бұл апатты үй алдағы уақытта реновация бағдарламасы аясында бұзылып, оның орнына жаңа тұрғын үй кешені салынбақ. Жоба аясында аулалық кеңістік, коммерциялық нысандар және автотұрақ қарастырылады. Қазіргі таңда құрылыстың қажетті құжаттары дайындалып, есеп-қисабы жүргізілуде.
Облыс әкімі құрылыс қарқынын оң бағалап, әлі де болса, аталған жұмыстарды жеделдетуді тапсырды.
– Дайын тұрғын үйлерді халық үшін сатып аламыз. Сондықтан, сапасы талапқа сай болуы тиіс. Алдағы бірнеше жыл ішінде ескі үйлердің тұрғындары біртіндеп жаңа баспаналарға көшірілуі керек, – деген Марат Ахметжанов. Реновация бағдарламасының облыстың Бурабай ауданында да белсенді жүзеге асырылып жатқандығын еске салды.
Ақмола облысы әкімінің баспасөз қызметі.
