Байқау
Жақында Көкшетау қаласындағы «Достар» мәдениет сарайында Ақмола облыстық халық шығармашылығы және мәдени демалыс орталығының ұйымдастыруымен Наурыз мейрамын мерекелеу аясында «Қазыналы қария» деген тақырыппен байқау өтті. Оған облыстың әр өңірінен 10 қария қатысты.
Байқаудың мақсаты – дәстүрлі отбасылық құндылықтарды насихаттау, үлкендердің ұлағатты өмірлері мен өнерлерін үлгі ету, жастар бойында патриоттық сезім қалыптастыру.
Байқау төрт кезеңнен тұрды. Қазылар алқасы әуелі соның бірі – «Қолөнер – сырлы өнер» деп аталған кезеңде қатысушылардың өз қолдарымен жасаған бұйымдарын көрді. Ол жерден ағаштан, темірден жасалған, жүннен тоқылған, тері мен матадан тігілген ұлттық нақыштағы заттар орын алған. Бірқатары халқымыздың ерте замандарда тұтынған ыдыс-аяқ, қару-жарақ, тұскиіз, текемет, көрпелері. Сондай-ақ, майлы бояумен салынған картиналар, өнертапқыштықпен өмірге келген дүниелер де бар. Ең бір көз сүйсінтіп, таң қалдырғаны Степногорск қаласынан келген 80 жастағы Аубай Дүрімхан әжейдің бізбен тоқыған кестесі болды. Оның қолынан шыққан дүниелерге қызықпау мүмкін емес. Өйткені, сирек өнер.
«Бірлігі жарасқан әулет» кезеңінде экраннан әр қатысушының отбасы, ұстанымы, шаңырағындағы берекелі тірлігі көрсетілді. Айрандай ұйыған, өзара үлкен-кіші сыйласқан, қазақы салт-дәстүрді ұстанған отбасыларды көру бір ғанибет.
«Батамен ел көгерер» кезеңінде өмірдің талай өткелінен өтіп, тәжірибе түйген, ұрпаққа айтары бар аталар мен әжелер ас та төк баталарын берісті.
«Өнерлі әулет» кезеңінде кейбіреулері ұлғайған жастарына қарамастан, жеке ән орындап, күй тартса, біреулері немерелерімен немесе қосақтарымен қосыла шырқады. Ең қызығы тағы да Аубай Дүрімхан әжейдің өнері болды. Ол қазақтың көнеден келе жатқан буын биі «Қара жорғаны» нақышына келтіріп, төгілген әуенге елітіп, еркін билеп берді.
Сонымен, қызу тартыстың нәтижесінде дәл осы Аубай Дүрімхан әжеміз оза шауып, бас бәйгені жеңіп алды. Ұйымдастырушылардың ұйғарымымен тағайындалған номинациялар қазылар алқасының әділ шешімімен өз иелерін тапты. Ешкім атаусыз, құрметсіз қалған жоқ. Олай болуға тиіс те емес еді. Сандықтау ауданынан келген Жақсыбай Ахметов «Батагөй қария», Зеренді ауданынан келген Маралбай Ерденов «Дана қария», Аршалы ауданынан келген Әлібек Тасболатов «Өнерлі қария», Степногорск қаласынан келген Сейдәлі Сұлтанов «Тағылымды қария», Егіндікөл ауданынан келген Амангелді Әлиақпаров «Шежірелі қария», Бурабай ауданынан келген Алтынбай Жандарбеков «Өнегелі қария», Біржан сал ауданынан келген Ғалил Жәнібеков «Шебер қария», Көкшетау қаласынан қатысқан Бақытжан Дусатова «Асыл әже», Астрахан ауданынан келген Егінбай Оспанов «Қадірлі қария» атанды. Алыс-жақыннан ат арылтып келген қариялардың барлығы да дипломдар мен ақшалай сертификаттарға ие болды.
Жүлделерді Ақмола облыстық мәдениет басқармасының басшысы Айгүл Сәбитова және қазылар алқасының мүшелері табыстады.
Көпшілік алдына шығып, өздерінің қазақы мінез-құлық, өнер-білімге жақындық, тапқырлықтарын паш еткен қариялардың бүгінгі жас ұрпаққа айтарлары да, көрсетер өнегелері де мол. Қариялардың жан-жақтылығы, көңілдерінің сергектігі мен сұңғылалықтары жастарды елең еткізді. Үлкендердің осындай өнерлерін көре отырып, жастардың өз бойларындағы кейбір енжарлық, немқұрайлылықтан арылуға ұмтылары сөзсіз. «Қазыналы қария» байқауы осындай ерекше әсерімен қымбат көрінді.
Серік САПАРҰЛЫ.
3 Total Views , 1 Views Today
