Ақ жол
Оқу-ағарту министрлігінің ақпаратына сәйкес, балалар ата-аналарының өтініші бойынша 6 жастан бастап мектепке қабылданады.
Құжаттарды egov.kz электрондық үкімет, жергілікті атқарушы органдардың ақпараттық жүйелері арқылы, сондай-ақ, қағаз түрінде 31 тамызға дейін тапсыруға болады. Өтініштер демалыс және мереке күндерін қоспағанда, дүйсенбіден жұмаға дейін қабылданады.
Қажетті құжаттар тізбесіне:
— ата-аналардың немесе басқа заңды өкілдердің өтініші;
— №065-у нысанындағы денсаулық жағдайы туралы анықтама және №052-2/у баланың денсаулық паспорты;
— өлшемі 3х4 см сурет (2 дана) кіреді.
Ал, егер сіз шетел азаматы болсаңыз, онда ата-аналар немесе басқа да заңды өкілдер Қазақстанда уақытша немесе тұрақты тұруға тиіс. Мектепке қабылдау үшін Қазақстанда тұрақты тұру құқығын растайтын құжаттарды, сондай-ақ, тұрғылықты жері бойынша тіркеу құжаттарын ұсыну қажет.
Бүгінгі таңда Ақмола облысында 536 мектеп жұмыс істейді, оның 6-уы жекеменшік. 2025-2026 оқу жылында бірінші сыныпқа 13 мыңға жуық бала барады деп күтілуде.
«Арқа ажарының» өз ақпараты.
