Өңірлік коммуникациялар қызметінде өткен кезекті брифингте Ақмола облысы ветеринария басқармасы басшысының міндетін атқарушы Ағыбай Сыздықов БАҚ өкілдеріне сала бойынша атқарылып жатқан жұмыстар мен алдағы жоспарлар жөнінде ақпарат берді.
Бүгінде ветеринариялық қауіпсіздікті сақтау арқылы мемлекет пен қоғамды ауыр індеттерден алшақ ұстауға мүмкіндік туып отыр. Қазіргі заман талаптарына сай болу үшін сала мамандары да бел жазбай еңбек етіп келеді. Осы мақсатта қабылданып және іске асып жатқан жаңа бастамалар да баршылық. Баспасөз жиынында ең алдымен соңғы үш жылда мал дәрігерлерінің жалақысы жүз пайызға өскені айтылды. Осыған қарамастан облыс бойынша ауылдық жерлерде ветеринарлық кадрлармен қамтамасыз ету 77 пайызды құрап отыр. Бұл дегеніміз әрине, әлі де болса сала мамандарының жетіспейтіндігін көрсетеді. Ал, кадр тапшылығы сала жұмысының күрделенуіне әсер ететіні сөзсіз. Ағыбай Сыздықов кадрлардың толығуына Қатаркөл жоғары ветеринария және биотехнология колледжі әжептеуір көмегін тигізетінін айтады. Мәселен, 2024 жылы 45 түлек оқуын аяқтап, 88 пайызы осы салаға жұмысқа орналастырылған, ал, биылғы жылы аталмыш оқу орнында 56 маман оқытылып жатыр. Ағымдағы жылдың 14 мамырында бос орындар жәрмеңкесі өткізілмек.
Өткен жылы өңірдің ветеринариялық станцияларының мамандары республиканың аккредиттелген оқу орындарында аса қауіпті инфекциялардың штаммдарымен жұмыс істеу бойынша біліктілікті арттыру курстарынан өткізілген.
Сонымен қатар, басқарма басшысының міндетін атқарушы өткен жылы саланы жандандыру мақсатына бөлінген қаражат пен атқарылған жұмыстар жөнінде де айтып өтті. Спикердің сөзінше, өткен жылы облыстық бюджеттен 466 миллион теңге бөлініп, ветеринариялық модульді пункттер ашылып, 22 қызметтік көлік сатып алыныпты. Ал, биыл бұл мақсатқа 419 миллион теңге қарастырылып, қажетті қондырғылары бар мал сою орындарын ашу және ауылды жерлердегі пункттерге тағы қосымша 20 қызметтік автомашиналар сатып алу көзделген. Сонымен қатар, қазіргі уақытта облыстың 8 ауданында мал қорымдарын салу үшін 412 миллион теңгеге бюджеттік өтінім берілген. Баяндамашының сөзіне сәйкес, байқасақ ветеринария саласының қажеттіліктері үшін өткен жылы бюджеттен 1,2 миллиард теңге бөлінсе, биыл бұл көрсеткіш өсіп, осы саланы дамыту үшін 4,3 миллиард теңге қарастырылып отыр. Ендігі кезекте бөлінген қаражатты игеру мен оны тиімді жұмсау барша ветеринарларға міндеттелген жүк пен абырой екені сөзсіз.
Брифинг барысында Ағыбай Сыздықов бруцеллезге және өзге де қауіпті ауруларға қарсы жан-жануарларды вакцинациялау жұмыстарына қатысты жұмысты да естен шығармады. Оның айтуынша, алдағы уақытта 6,4 миллион мал басын және 1,3 миллион құс және үй жануарларын мерзімді вакцинациялау жүргізіледі. Жыл басынан бері аса қауіпті мал ауруларын анықтау үшін арнайы зертханаларға 85,9 мың ірі қара малдың қан сынамасы жеткізілген.
Бұл жұмыстың қазіргі уақытта 30 пайызы орындалған, ал, жыл аяғына дейін оны толық аяқтау жоспарланып отыр.
Брифинг соңында журналистер қаңғыбас иттер мәселесіне қатысты сұрақтар қойды. Басқарма басшысы расында, қазір қоғамдық ортада қаңғыбас иттердің көбейіп кеткендігін растай келе, жыл басынан бері 800 ит ауланып, мерзімді вакцинациялау жүргізіліп, иелеріне қайтару немесе арнайы орындарға тапсыру жұмыстарының жүргізілгендігін алға тартты. Оның айтуынша, ағымдағы жылы қаңғыбас иттермен жұмыс жүргізуге бюджеттен 96,5 миллион теңге бөлінген. Бірақ, итті аулаумен айналысатын компанияның табылмай жатқандығынан бұл жұмыс тұралап тұр. Қазіргі уақытта қайтадан конкурс жарияланып, қорытындысы күтілуде.
Негізінен, бүгінде Ақмола облысының шаруа қожалықтары ауыл шаруашылығы жануарларын емдеу мен профилактикалық шараларды жүргізуде бірнеше жылдан бері «Асыл Көкше зооветснаб» жауапкершілігі шектеулі серіктестігімен тығыз байланыста жұмыс істеп келеді. Бүгінде бұл серіктестіктің де жұмыс тәжірибесі молайып, емдеудің заманауи әдістерін қолдану арқылы түрлі аурулардың алды алынып жатыр. Тәжірибелі ветеринарлар шақырту бойынша мал фермаларына барып, емдеу мен вакцинациялауға қатысады. Жалпы, брифингте айқын байқалғанындай, сала жұмысын жақсарту бағытында ілгерілеушілік жоқ емес, бар. Ендігі міндет – оны алда да баянды ете түсу.
Майра ҚУАНЫШҚЫЗЫ,
«Арқа ажарының» өз тілшісі.
Суреттерде: мал табынында ветеринарлық емдік шараларды жүргізу; Жандос Смағұлұлы Нұржігіт бүгінгі таңда Бурабай ауданындағы Қатаркөл жоғары ветеринария және биотехнология колледжінде оқиды. Жастайынан мал шаруашылығына көзі қанық болып өскен осы оқу орнында тиянақты білім алып, білікті мал шаруашылығы маманы болып шығуды алдына мақсат етіп қойған.
Суреттерді түсірген Нұрболат БЕКТҰРҒАНОВ..
