Астанада өткен республикалық деңгейдегі FIRST Robotics чемпионатында Көкшетау білім-инновация лицейінің оқушылары керемет жетістікке қол жеткізді. 2025 жылдың 12-13 сәуірі аралығында өткен чемпионатқа еліміздің түкпір-түкпірінен 700-ге жуық оқушы қатысты.
Бұл додада Көкшетау білім-инновация лицейінің Sipinine командасы нағыз топ жарып, Inspire Award Winner, Winning Alliance Captain санаттары бойынша жеңімпаз атанды. Сөйтіп, олар осы жарыс алаңында бірден екі бірдей марапатқа ие болды.
Бұл — Қазақстан тарихында бір команда екі чемпиондық туды қатар иеленген екінші жағдай болып отыр. Бүгінде көкшетаулық 10-сынып оқушыларының үздік нәтижеге қол жеткізгеніне барша білім саласының өкілдері қуануда. Бұл жарыстағы жалпы нәтиже бойынша оған 4 команда қатысып, 3 команда жүлделі орындарға ие болды. Жас ғалымдарымыздың бұл жетістігін біз де өз тарапымыздан жоғары бағалап, мұны Көкшетау білім-инновация лицейі ұжымының сапалы білім мен тың идеяларға негізделген еңбегінің жемісі деп сеніммен айта аламыз. Жарайсыздар, жас өнертапқыштар, Қазақстанның атын әлемдік деңгейде таныта беріңіздер дегіміз келеді!
«Арқа ажарының» өз ақпараты.
7 Total Views , 1 Views Today
