Назарбаев зияткерлік мектебінде (NIS) «Келешек мектептерінің» педагогтарына арналған кәсіби даму семинары болып өтті. Семинар барысында мұндай шараның осы санаттағы білім ордаларының оқу-тәрбие үдерісіне оң ықпал ететіні айқын сезілді.
Соңғы уақытта Назарбаев зияткерлік мектебінің оқытушылары «Келешек мектептері» ұлттық жобасының мұғалімдерімен өз педагогикалық тәжірибесімен бөлісіп келеді. Жуырда білім беру ұйымы «Заманауи мектеп зертханасы: мұғалімге арналған практикалық дағдылар» тақырыбында семинар-практикум өткізіп, оған 27 педагог қатысты. Қатысушылар интеллектуалды мектептерде қолданылатын тиімді әдіс-тәсілдер мен тәжірибелерді үйрену мүмкіндігіне ие болды.
Семинар педагогтардың жаратылыстану ғылымдары мен технологиялық цикл бойынша практикалық дағдыларын дамытуға бағытталды. Бағдарлама физика, химия, биология, информатика, STEAM және робототехника пәндерінде зертханалық сабақтарды ұйымдастыру мен өткізу мәселелерін қамтыды. Арнайы назар мектептік зертханалық жабдықтарды, PASCO цифрлық датчиктерін, виртуалды зертханаларды, Arduino платформасын және Python бағдарламалау тілін қауіпсіз және тиімді қолдануға аударылды.
Семинар барысында Көкшетаудағы NIS мұғалімдері, NIS Педагогикалық шеберлік орталығының тренерлері және ауылдық тірек мектептерінің педагогтары қатысушыларға өз тәжірибелерімен бөлісті. Практикалық сабақтар мен шеберлік сыныптары семинар қатысушыларына білімдерін жаңартуға ғана емес, заманауи зертханалық және цифрлық шешімдерді оқу үдерісіне енгізуге арналған нақты құралдарды алуға мүмкіндік берді.
«Арқа ажарының» өз ақпараты.
