Қазақстан астанасы Нұр-Сұлтан мен Алматы қаласы 19 наурыздан бастап карантинге жабылады.
Президент жанындағы төтенше жағдай режимін қамтамасыз ету жөніндегі мемлекеттік комиссия Қазақстанның басқа қалаларына коронавирустың таралуына жол бермес үшін Нұр-Сұлтан мен Алматы қалаларында қосымша шектеу, алдын алу және эпидемияға қарсы шараларды енгізу туралы шешім қабылдады. Осыған сәйкес, 19 наурызда сағат 00:00-ден бастап екі мегаполисте карантин жарияланады.
Еске сала кетсек, Қазақстанда коронавирус жұқтырғандар саны 35 адам. Оның 17-сі Алматыда, қалған 18-і Нұр-Сұлтан қаласында. Қазақстанда 16 наурыз таңғы сағат 08.00-ден бастап төтенше жағдай режимі жарияланды. Ол отыз күнге созылады.
Мамандардың сөзінше, вирус ауа-тамшы жолдары арқылы жұғады, сондықтан бетперденің қорғаныс күші аздау болса да тағып жүрген абзал.
Ресей ғылым академиясы институтының Қоғам денсаулығын сараптау және болжау зертханасының басшысы, медицина ғылымдарының докторы Борис Ревич коронавирусты жұқтыру қаупін бәсеңдету үшін медициналық маска тағып, амандасу кезінде қол алыспауға, құшақтаспауға кеңес берді.
Бетпердені қолдану жүрегі ауыратындар мен егде жастағыларға қиындау, себебі, ол тыныс алуды бояулатады екен. Егер маскаңыз болмаса, бетіңізді мойын орағышыңызбен жауып жүрген абзал, дейді мамандар. Сондай-ақ, ауру жұқтырудың алдын алу үшін қолды сәл бүгіп, шынтаққа қарай түшкіру керектігі қоса айтылады. Сонымен қатар, бұған дейін диетолог Иван Алименко карантин кезінде және үйде жұмыс істегенде қалай тамақтану керегін айтқан болатын.
Еліміздің тауарлар мен көрсетілетін қызметтің сапасын және қауіпсіздігін бақылау комитетінің мәліметіне сүйенсек, наурыздың 18-не дейінгі жағдай бойынша әлемде 194651 адамда коронавирус жұқпасы тіркелген. Оның 7882-сі инфекциядан көз жұмған. Дегемен, 81102 адам коронавирустан емделіп шыққан.
Асылай ҚАДЫРҚЫЗЫ,
«Арқа ажарының» өз тілшісі».
