Көкшетау медициналық жоғары колледжінде «Медициналық және әлеуметтік күтім көрсету» құзыреті бойынша алғаш рет өңірлік WorldSkills Aqmola 2021 чемпионаты өткізілді.
Медициналық және әлеуметтік күтім көрсету дегеніміз – адамның денсаулығына, физикалық және психо-әлеуметтік жағдайына, науқастар мен қызмет алушылардың және олардың отбасыларының әртүрлі жағдайда өсуі мен дамуына, оңалуына байланысты қызмет түрлері мен біліктіліктер. Осы сала мамандары қарттар үйі мен ауруханаларда, бір күндік стационарлар мен әлеуметтік қамқорлыққа алатын үйлерде қызмет атқарады.
Өңірлік чемпионатқа медициналық колледждің 5 білім алушысы мен облыстың медициналық ұйымдарында қызмет етіп жүрген жас мамандар қатысты. Олардың жұмыстарын тәжірибелік денсаулық сақтау саласының әлеуметтік серіктестері мен клиникалық пәндерді оқытушылар бағалап, сараптады. Қатысушылар байқауда медициналық ұйымдарда, үй жағдайында көрсетілетін қызмет түрлері мен медициналық ұйымда күндізгі стационар негізінде науқастарға консультация жүргізу секілді үш модуль бойынша бақтарын сынады. Сарапшылардың мәлімдеуінше, қатысушылар аталған үш модульден де сүрінбей өтіп, өздерінің тәжірибеге жақсы дағдыланғандарын, науқастармен тиісті қарым-қатынас жасай алатындықтарын көрсете алыпты.
Сонымен, өңірлік сайыс қорытындысы бойынша Көкшетау жоғары медициналық колледжінің студенті Әйгерім Сапар бірінші дәрежелі дипломға ие болып, жеңімпаз атанды. Екінші дәрежелі дип-
лом Көкшетау қалалық емханасының дәрігерге дейінгі қарау кабинетінің фельдшері Дарья Киселеваға бұйырды. Сондай-ақ, аталмыш колледж студенті Гүлдана Балтабекова мен «Бурабай Авиценна» ЖШС-нің мейірбикелері Алтын Ғаббасова мен Анастасия Маланина ынталандыру сертификаттарымен марапатталды.
Енді өңірлік дода жеңімпазы WorldSkills Kazakstan 2021 ұлттық чемпионатында облыстың намысын қорғайтын болады. Олай болса, жерлесімізге сәттілік тілейміз!
Ырысалды ШАМШИЕВА,
«Арқа ажарының» өз тілшісі.
