Ағымдағы жылдың 17 қаңтарында COVID-19-ға қарсы Бірыңғай дистрибьютор «СК-Фармация» қоймасына «Sputnik Light» вакцинасының 150 мың дозасы келіп түскен.
Эпидемиологиялық жағдайға байланысты Қарағанды фармацевтикалық кешені ҚР Денсаулық сақтау министрлігіне гуманитарлық көмек ретінде «Sputnik Light» вакцинасын тегін тарту етті. Бірыңғай дистрибьюторға келіп түскен вакциналар партиясы Қазақстан Республикасы денсаулық сақтау министрінің бұйрығына сәйкес елдің барлық өңірлеріне жедел жөнелтілетін болады. Бұл ел азаматтарының коронавирустық инфекцияға қарсы екпе алуы үшін қолжетімді болады.
«Sputnik Light» – бұл қайта вакцинациялау үшін қолданылатын бір компонентті вакцина. «Sputnik Light» вакцинасы Н.Ф.Гамалеи атындағы Ұлттық эпидемиология және микробиология ғылыми орталығы және Ресейдің тікелей инвестиция қорымен бірігіп жасалған.
«Sputnik Light» вакцинасы Ресейде 2021 жылдың мамырында тіркелген. Бұл препарат «Sputnik V» бірінші компоненті болып табылады. Ресейлік тікелей инвестиция қорының мәліметі бойынша, препараттың тиімділігі 79,4 пайызды құрайды. Бұл вакцинаның қауіпсіздігі бірқатар елдердегі нақты вакцинация деректерімен расталған. Оның ішінде БАӘ, Бахрейн, Аргентина, Ресей, Мексика, Сербия, Сан-Марино, Филиппин, Ливия, Парагвай, Венгрия, Әзірбайжан және Беларусь елдері бар. Сондай-ақ, жетекші халықаралық ғылыми журналдарда 20-дан астам жарияланымдар бар.
Вакцинаның сапасын өндірушіден бастап медициналық ұйымдарға дейін қамтамасыз ету үшін Бірыңғай дистрибьютор суық тізбектің тиімді мониторингін жүргізеді. Мұздатылған препарат түріндегі «Sputnik Light» вакцинасын жарықтан қорғалған жерде, минус 18°C-ден аспайтын температурада сақтау керек.
Жалпы, еліміз бойынша халықты вакцинациялау үшін «QazVac», «Sputnik V», «Hayat-Vax», «СoronaVac», «Sinopharm», «Comirnaty Pfizer / BioNTech» вакциналары қолданылатын болады.
Асылай ҚАДЫРҚЫЗЫ,
«Арқа ажарының» өз тілшісі.
