– 2023 жылы әлем елдері азық-түлік дағдарысына тап болуы мүмкін. Бұл туралы ҚР Сыртқы істер министрлігіндегі баспасөз мәслихатында БҰҰ Бас хатшысының бірінші орынбасары Амина Мұхаммед мәлім етті, деп хабарлайды ҚазАқпарат тілшісі.
«Украинадағы жағдайға байланысты азық-түлік қауіпсіздігі саласында қауіп-қатер бар. Дегенмен азық-түлік қауіпсіздігі саласындағы мәселелер барша әлемдегі пандемия мен локдаундардан бастау алып отыр. Себебі індет салдарынан әлем елдері арасында өнімді жеткізу тізбегі бұзылған болатын. Ал соғыс жағдайы бұл қиындықтарды ушықтыра түсті», – деді А.Мұхаммед.
Оның айтуынша, БҰҰ Бас хатшысы мен әлем елдерінің көшбасшылары және олардың техникалық командалары алдағы уақытта болуы мүмкін азық-түлік дағдарысын еңсеруге қатысты шешімдерді ұсынып жатыр. «Қымбаттап бара жатқан азық-түлік бағасын түсіру үшін бидай тасымалы бағытында Қара теңіздегі қарым-қатынасты жандандыру керек. Алайда бұл дағдарыстың мән-жайын дұрыс түсінген жөн.
Яғни, соғыс аяқталмаса, проблемалардың салмағы да ауырлай береді. Биыл азық-түлік дағдарысының салдарын аса қатты сезінбесек те, алдағы жылы бұл саладағы проблемалар ауқымды болатынын байқаймыз», – деді БҰҰ Бас хатшысының бірінші орынбасары. Айта кетейік, Халықаралық Азық-түлік және ауыл шаруашылығы ұйымының басшысы Цюй Дунъюй Украинадан тасымалданатын жүктің қысқаруы Африка мен Азиядағы азық-түлік тапшылығы қаупін күшейтетінін ескертті.
Бұдан бұрын хабарланғандай, бүгін Мемлекет басшысы Қасым-Жомарт Тоқаев Орталық Азияға сапары аясында Қазақстанға келген БҰҰ Бас хатшысының бірінші орынбасары Амина Мұхаммедті қабылдады. А. Мұхаммед Бірікке Ұлттар Ұйымы Қазақстанда жүргізіліп жатқан реформаларды қолдайтынын атап өтті.
