– Қазір елімізде 450 мыңға жуық адам жұмыссыз жүр. Бұл туралы мемлекеттік әлеуметтік сақтандыру қоры АҚ бас директоры Нұрсұлу Кемел мәлім етті, деп хабарлайды ҚазАқпарат тілшісі.
«Жұмыссыз қалған азамат портал немесе жұмыспен қамту орталығы арқылы жұмыссыз ретінде тіркелуі керек. Бізде көп азамат тіркелмей уақыт жоғалтып алады. Мемлекеттен берілетін жәрдемақы жұмыссыз ретінде ресми тіркелгеннен кейін ғана тағайындалады.
Одан әрі төлем автоматты түрде рәсімделеді», — деді Нұрсұлу Кемел орталық коммуникациялар қызметі алаңында өткен баспасөз мәслихатында. Оның айтуынша, жұмыссыз ретінде әлеуметтік төлем алатындардың өсімі байқалмайды. «Қазір 450 мыңға жуық жұмыссыз адам бар.
Бұл — ресми статистика. Соның 106 мыңы біздің қорға келіп отыр. Сол жұмыссыз жүрген азаматтардың 20-30 мыңы мемлекет тарапынан берілетін әлеуметтік төлемнің барын әлі де білмейді.
Біз кәсіпорындар мен жұмыс берушілерге қызметкеріңізді жұмыстан шығарып жатсаңыз, әлеуметтік төлемнің барын айтыңыз деп ескертіп жатамыз», — дейді ол. Бұған дейін елімізде 3 мыңнан астам ер адам бала күтіміне байланысты декретке шыққанын хабарлаған едік.
