Ақмола облыстық мәслихатының әлеуметтік мәселелер жөніндегі тұрақты комиссиясының төрағасы Саят Сыздықов, депутаттар Клара Меңдібаева мен Құралай Жұмабекова Бұланды ауданының орталығы Макинск қаласының арнаулы әлеуметтік қызметтер көрсету орталығында болды.
Жұмыс сапарында Бұланды аудандық мәслихатының төрағасы Нұрбек Сексенов, аудандық мәслихаттың әлеуметтік мәселелер жөніндегі тұрақты комиссиясының төрағасы Марат Алтыбаев, «AMANAT» партиясының аудандық филиалының төрайымы Раушан Қожабай бірге болды.
Орталықтың директоры Надежда Ларионова хабарлағанындай, 1996 жылы құрылған коммуналдық мемлекеттік мекеме 60 қызмет алушыға – қарттар мен мүгедектерге арналған. 53 қызметкер жұмыс істейді, олардың ішінде дәрігерлер, медбикелер, санитарлар, психолог бар. Орталық бұрынғы жатақхана ғимаратында орналасқан, онда қарттарға барынша қолайлы жағдай жасалған.
Депутаттар мекеменің қызметімен танысып, қарттармен сөйлесті, қызметкерлердің өтініштері мен тілектерін тыңдап, проблемалық мәселелерді талқылады. Бүгінде барлық әлеуметтік мекемелерде цифрландыру енгізілуде. «Социум» жүйесінде жұмыс істеу үшін орталыққа компьютерлер сатып алу қажет. Қарттарға қызмет көрсететін шағын автобустар үшін гараж да керек болып отыр. Сондықтан, осыған қатысты бюджеттік өтінімдер жұмыспен қамтуды үйлестіру және әлеуметтік бағдарламалар басқармасына жолданды.
Ақмола облыстық мәслихатының баспасөз қызметі.
