Жаңа жобалар – жаңа мүмкіндіктер

Бурабай ауданының әкімі Қанат Қарауылов «Өңірдің 2018 жылғы әлеуметтік-экономикалық дамуының қорытындылары және биылғы жылға белгіленген міндеттер туралы» тұрғындар алдындағы есеп беру кездесуін өткізді. Кездесуге облыс әкімінің орынбасары Марат Иғали қатысты.

Аудан әкімі өзінің сөзін Щучинск қаласы, Бурабай кенті және ауылдық округтердің әкімдерімен өткізілген есептік кездесулерден бастады.
– Аудан бойынша өткен барлығы 56 есептік кездесуге 3 мыңнан астам адам қатысып, әлеуметтік мәселе бойынша 38 ұсыныс айтылды. Ұсыныстардың көпшілігіне сол жерде жауаптар берілсе, кейбірінің жауаптары апта соңында аудан әкімдігінің сайтында жарияланатын болады, – деді Қанат Қарауылов.
Сонымен қатар, аудан әкімі өткен жылғы өзінің есептік кездесуінде бақылауға алынған бес мәселенің бүгінгі күні жүзеге асырылғанын атап өтті. Нақтырақ айтсақ, Щучинск қаласындағы 23 көшеге құны 52 миллион теңгеге ағымдағы жөндеу жұмыстары жүргізілді. Веденовка-Қарабұлақ аралығындағы аудандық мақсаттағы жолдың 10 шақырымы жөнделді. Николаев орта мектебіне автобус сатып алынды. Сарыбұлақ ауылында ауыз су алынатын құдықтың маңы қоршалды. Қаңғыбас иттер мен мысықтардан елді мекендерді тазарту жұмыстары жүргізілді.
Индустрияландыру картасынан тыс құны 1,8 миллиард теңгеге 8 жоба жүзеге асырылды. Осының нәтижесінде 353 жаңа жұмыс орны ашылды. Ауыл шаруашылығы өнімдерінің көлемі 29 миллиард теңгені, оның ішінде егіншілік шаруашылығы өнімдері 18,9 миллиард теңгені, мал шаруашылығы 10,1 миллиард теңгені құрады. 2018 жылы көктемде 157 мың гектар алқапқа дәнді және бұршақ дақылдары сіңіріліп, барлығы 163,4 мың тонна астық жиналды. Гектар берекесі 17,4 центнерден айналды. Егіншілік шаруашылығын дамытуға мемлекет тарапынан 540 мил-
лион теңге субсидия бөлінді. Сонымен қатар, ауданда мал шаруашылығын дамытуға да зор көңіл бөлінуде.
– Республикалық бюджеттен бөлінген субсидия есебінен мал басы көбейіп келеді. Оның ішінде мемлекеттік бағдарламалар есебінен 258 бас асыл тұқымды ірі қара сатып алынды. Ет бағытында екі ферма, сүт бағытында бір ферма құрылды. «Цифрлық Қазақстан» бағдарламасы аясында Qoldau.kz порталы арқылы субсидиялау үрдісі автоматтандырылды, – деді аудан әкімі.
Сонымен қатар, Қанат Қарауылов «Рухани жаңғыру» бағдарламасын жүзеге асыру, цифрландыру бойынша атқарылған жұмыстарды саралай келе, биылғы жылдың басты міндеттеріне тоқталды. Тұрғын үй құрылысы, туризм, шағын және орта бизнес, халықты еңбекпен қамту салалары бойынша мақсатты жұмыстар жүргізілді.
Щучинск-Бурабай курортты аймағын одан әрі дамыту бағыты бойынша 8 инфрақұрылымдық жобаны жүзеге асыру жұмыстары одан әрі жалғасын тапты. Оның ішінде 4 жаңа жоба қолға алынды. Жекеменшік инвестиция есебінен төрт жаңа туристік нысан пайдалануға берілді. «Жеке батыр» мен «Щучинск» шипажайлары қалпына келтірілуде. Бұдан бөлек, 16 туризм нысанының құрылысы жүргізіліп жатыр. «Бурабай» визит орталығы жаңартылып, «Ботай» мәдени-тарихи музейі мен Бурабай кентінде жаңа мешіт ашылды. Өткен жылы республикалық шаңғы базасының ашылуы мен Бурабай курортында «Біржан-Сара» операсының қойылуы да ауданның мерейін бір көтеріп тастады.
Облыстың қай өңірінен алсақ та, баспана мәселесі алдан шығады. Халық саны күн санап өсіп келе жатқан Бурабай ауданында да осы мәселе өткір болып отыр. Әкімнің баяндамасынан кейін тұрғындар тарапынан
«7-20-25» мемлекеттік бағдарламасына қатысу, осы арқылы баспана алу мүмкіндіктері туралы сауалдар қойылды.
Кездесуді қорытындылаған аудан әкімі өзіне жолданған сауалдардың барлығы бақылауға алынып, тиісті шешім қабылданатындығы туралы уәде берді.
Аслан ОСПАНОВ,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *