Учаскелік инспекторға қолдау көрсетілді

Викторовка селосының көшелеріне полицияның тірек пунктімен қосылған бейнекамералар орнатылды.

Камералар бұл елді мекеннің адамдар көп жиналатын учаскелерінде болатын оқиғаларды учаскелік инспектордың тәулік бойы бақылауына және қоғамдық тәртіптің бұзылуына уақытында қарсы тұруға мүмкіндік береді. Бұл игілікті іске қолдау көрсеткен «Викторовка» серіктестігінің директоры Владимир Андрюхин учаскелік полиция инспекторы, аға лейтенант Бақтияр Қайырбековке тұрмысқа қолайлы тұрғын үйдің кілтін табыс етті. Бүгінгі таңда учаскелік инспектордың бақылауына 2800 адам тұратын Викторовка мен Айдабол селолық округтері кіреді. Полицияның аға лейтенаты өзінің қызметі мен тұрмысына қолдау көрсеткен серіктестік басшысына алғысын білдірді.
Жергілікті жерде учаскелік полиция инспекторының беделін көтеру Ішкі істер министрі мен облыстық полиция департаменті басшысының негізгі талаптарының бірі. Ведомство бастығы, генерал-майор Берік Біләловтың тапсырмасы бойынша қызмет көрсететін аумақты тұрақты бақылауды қамтамасыз ету үшін учаскелік полиция инспекторы қызмет көрсететін елді мекенде тұрақты тұрулары тиіс. Сондай-ақ, аудан орталықтары мен ауылдық округтерде бейнебақылау жүйесі белсенді түрде енгізіліп, полицияның тірек пункттері жаңғыртылуда. Бұл бағытта ведомствоға жергілікті атқарушы органдар мен ауыл шаруашылығы құрылымдары қолұшын созып отыр. Бұны Владимир Андрюхиннің игілікті ісі айғақтай түседі.
Рамазан ТІЛЕУОВ,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *