«Шаңырақ» əлеуметтік-психологиялық жəне зерттеу орталығы» қоғамдық қоры жас ерлі-зайыптылар арасында отбасы мəселесін шешуге бағытталған семинар-тренинг ұйымдастырды.
Игі шараның мақсаты жұбайлар арасындағы жарасымды нығайту жолдарын, отбасылық мəселелерді қалай шешу керек екенін түсіндіру. Ерлі-зайыптыларға арналған тренингті өткізген аталмыш мекеменің психолог маманы Жанбота Əбдірахманова. Ол қатысушыларға арнайы тапсырмалар беріп, отбасылық өмірде бірін-бірі түсінуге талпыну қажет екенін тілге тиек етті. Ал, қоғамдық қордың директоры Берік Рақышев тренинг барысында қазіргі таңда ажырасулар саны көбейіп бара жатқанын жəне олардың дені болмашы себептерден болаты-
нын айтты. Сондықтан, осындай тренингтер арқылы жастарға отбасының шырқын бұзбай, керісінше бір-бірлерін бағалауға бағыттайтын «Шаңырақ» əлеуметтік-психологиялық жəне зерттеу орталығы» қоғамдық қоры əр адамға көмектесуге əзір екендігі жайлы сөз қозғалды. Семинар-тренингке қатысушы Ермек Сағындықов жиналған жас жұбайларға отбасылық өмірде келеңсіз жағдайлар орын алмау үшін алғаш танысқан сəттен бастап, бір-біріне шынайы болуға кеңес беріп, адамның байлығы да, бары да отбасы болып табылатындығын, шағын мемлекеттің гүлденуі əр адамның өз қолында екенін атап өтті. Отырыс соңында тренингке қатысушылар танымды жиынды ұйымдастырушыларға ризашылықтарын жеткізіп, бір-бірлеріне жылы лебіздерін білдірді.
Назгүл РАБИЛОВА.
