Шоқан Уәлиханов атындағы Көкшетау мемлекеттік университетінде облыстық наркологиялық оңалту орталығының ұйымдастыруымен «Ішімдікке жоқ де!» тақырыбында дөңгелек үстел өткізілді.
Отырысқа аталмыш білім ордасының студенттері қатысты. Шараның маңыздылығына тоқталған орталықтың психологы Эльмира Приходька білім алушылар арасында психологиялық ойын да өткізді. Содан соң орталықтың бөлім меңгерушісі Ғалия Мұхамедиярова жас ұрпаққа өз болашақтарын ойлап, «ащы суға» қызықпауларын өтінді. Бұдан әрі арақ ішкен адамның бүйрек пен бауыры, жүйке жүйесі сыр беріп, әртүрлі ауруларға шалдығатындығы айтылды. Өмірден алынған мысалдар келтіріліп, қазіргі қоғамда арақтан өзге, сыраға да тәуелді адамдар қатары көбейіп жатқаны да қамтылды. Шара соңында студенттер білікті мамандарға сұрақтар қойып, өзара пікір алмасылды.
Назгүл РАБИЛОВА.
