Өңірлік коммуникация-лар қызметінде «Б» корпусының мемлекеттік қызметшілерін кешенді аттестаттау» тақырыбында баспасөз мәслихаты өткізіліп, онда Ақмола облысы бойынша мемлекеттік қызмет істері және сыбайлас жемқорлыққа қарсы іс-қимыл департаментінің басшысы Берген Беспалинов осы санаттағы мемлекеттік қызметшілерді аттестаттаудан өткізу ережелері туралы баяндады.
Департамент басшысының айтуынша, бүгінгі таңда облыста 706 мемлекеттік орган жұмыс істейді. Бұл органдарда 5962 мемлекеттік лауазым болса, оның 7-еуі саяси, 25-і «А» корпусының мемлекеттік лауазымдары.
– Уәкілетті орган әзірлеген кешенді аттестаттауды өткізудің тәсілдемелеріне сәйкес, жекелеген санаттарды қоспағанда, облыста 3224 мемлекеттік қызметші аттестациялаудан өтеді. Тестілеуді күніне төрт лектен өткізу жоспарланып отыр. Тестілеу залында 34 жұмыс компьютері орнатылғандықтан бір күнде 136 адам тестілеуден өте алады. Осыған байланыс-ты ағымдағы жылдың қаңтар айынан бастап, маусым айына дейінгі алдын ала желілік кестесі әзірленіп, аттестаттаудан өту кезегінің тізімі жасалды, – деді Берген Беспалинов өз сөзінде.
Сонымен қатар, департамент басшысы зейнет жасына шығуға 2 жыл қалған, аяғы ауыр, бала күту демалысындағы және 6 ай еңбек өтілімі жоқ тәрізді санаттағы мемлекеттік қызметшілердің аттестациялаудан босатылатынын да атап өтті.
Брифинг барысында журналистер осы күні кейбір мемлекеттік қызметшілер тарапынан кездесетін жемқорлықпен күресу бағытында атқарылып жатқан жұмыстар туралы сұрап білді.
Аслан Оспанов.
Суретті түсірген Берік ЕСКЕНОВ.
