Бұл –білгендік белгісі

Келместің кемесімен  жылдан-жылға ортамыздан ұзап, көңілге ауыр мұң ұялататын соғыс ардагерлерінің арамызда жүрген көзі тірілеріне Жаңа жылдың қарсаңында Елбасы сыйлығын тапсыру рәсімі облысымыздың  барлық аудандары мен қалаларын қамтыды.

Мұны облыс әкімінен бастап әрбір аудан мен қала басшысы өзінің аға ұрпақ алдындағы төл парызы ретінде қабылдап, қарттарға барынша ыстық ықылас пен жылы пейіл білдіруге тырысты.
2015 жыл еліміз үшін көптен күткен Ұлы Жеңістің 70 жылдығы атап өтілетін мерекелі жыл. Сондықтан да, дәл осы кезеңде ардагерлерімізге деген сүйіспеншілігіміз, құрметіміз бен тағзымымыз барлық кездегіден де ерекше болуы керектігін  өзінің жеке өнегесімен тағы да бір жарқырата көрсетіп берген Елбасымыздың  әрбір соғыс ардагеріне жолдаған   Жаңа жылдық құттықтау хаты, мерекелік сый-сияпаты әрине, аға ұрпақ өкілдері жүрегін барынша тебірентіп, шуақты сезімге бөлегендігі анық. Оны бүгінгі майдангерлермен болып жатқан осындай әрбір кездесу де жақсы көрсетуде. Мына суретте де Шортанды, Ерейментау және Астрахан аудандарының әкімдері Гүлнұр Сәдуақасова, Ермек Нұғыманов, Талғат Ерсейітовтің өз өңірлеріндегі соғыс ардагерлерін Елбасы атынан Жаңа жыл мерекесімен құттықтау сәттері бейнеленген. Қазақ қашаннан үлкенін қадірлеп, қастер  тұта білген халық. Олай болса, лайым осы жақсы өнегеміз ешқашан ұмытылмай, өз жалғасын тауып отырсын дейміз…

«Арқа ажарының» өз ақпараты.

Пікір қалдыру

Міндетті өрістер таңбаланған Обязательные поля помечены *