Дарынды балаларға арналған мамандандырылған №3 облыстық мектеп-интернатында «Бала би» шешендік өнер сайысы болып өтті.
«Жас Ұлан» бірыңғай балалар мен жасөспірімдер ұйымы кубогына арналған бәсекеге Көкшетау қаласы мен Ақкөл, Аршалы, Еңбекшілдер, Ерейментау, Есіл, Жақсы, Зеренді, Сандықтау, Шортанды, Бурабай аудандарынан 20 топ қатысты. Бұл сайыс өскелең ұрпақтың ұлттық рухын оятып, шешендік өнерді дамыту арқылы болашақ ел зиялыларын тәрбиелеу мақсатын көздеді.
Үміткерлердің әрқайсысы шешендік өнер сайысына жақсы дайындықпен келгендіктерін аңғардық. Олар «ЭКСПО-2017» көрмесінің Қазақстанға пайдасы, «Мәңгілік Ел» идеясының орындалуы, қазақ тілін ғылым мен білімнің, интернеттің тіліне айналдыру жолы, жасұландықтар ұйымы туралы салиқалы ой айтты.
Жартылай финалда Мәлік Ғабдуллин атындағы №3 көптілде оқытатын кәсіби мектеп-гимназиясының «Заңғар» тобы мен Зеренді ауданының «Сөз мәйегі» тобы суырылып шығып, финалдық бәсекенің көрігін қыздырды.
Сайыс қорытындысында «Заңғар» тобы жүзден жүйрік атанып, «Жас Ұлан» бірыңғай балалар мен жасөспірімдер ұйымының арнайы кубогымен марапатталды. Екінші орынды «Сөз мәйегі» алса, үшінші орындарға Бурабай ауданынан келген «Алаш ұлы» және Көкшетау қаласындағы дарынды балаларға арналған мамандандырылған №3 облыстық мектеп-интернаты қол жеткізді.
Облыстық «Қазақ тілі мен мәдениеті» қоғамдық бірлестігінің атынан Зере Еспайқызы «Жас Ұлан» бірыңғай балалар мен жасөспірімдер ұйымы» қоғамдық бірлестігінің төрағасы, шешендік өнер сайысының ұйымдастырушысы Мейрамбек Закировке Алғыс хат тапсырып, қызықты әрі тартымды өткен «Бала би» сайысына жоғары баға берді.
Жеңімпаздар дипломдар мен бағалы сыйлықтарға ие болды.
«Арқа ажарының» өз ақпараттары.
