Алдағы 19 ақпанда Астана қаласында Қазақстан имамдарының бірінші форумы өтеді. Бұл алқалы басқосуда Қазақстан мұсылмандары діни басқармасының 2020 жылға дейінгі қызметін дамытудың тұжырымдамасы қабылданады деп күтіліп отыр. Осыған орай, біз Қазақстан мұсылмандары діни басқармасының Ақмола облысындағы өкілі, Науан хазірет атындағы Көкшетау орталық мешітінің бас имамы Қанат Қыдырминнен осы шараның мақсаты жөнінде қысқаша айтып беруін өтінген едік. Заман қарыштап дамыған сайын діни құндылықтарды да уақыт талабына сай жаңа арнада дамыту аса маңызды болып табылады. Сондықтан, бұл тұжырымдама қоғамымызда имани істерді дамытуға дәнекер болады. Мүфтиятпен ұсынылған бұл құжат еліміздің діни басқармасының өз жұмысын жаңа арнада жүргізуге деген талпынысын білдіреді. Себебі, бұл тұжырымдамада діни рәсімдерді жүргізуден бас-тап, осы салада білім беру, кадр әлеуетін жақсарту және дін қызметкерлерінің жауапкершілігін арттыру сияқты мәселелер қамтылып отыр.
Біз осы күнге дейін сыртқа көбірек қарайлап келдік. Діни құндылықтарды дамыту мәселесіне байланысты да солай болғанын білеміз. Елбасымыз да шетелде діни оқу оқитын жастардың ата-бабаларымыздан жалғасып келе жатқан Әбу Ханифа мәсхабы негізінде білім жинағаны қажет екенін атап көрсеткен болатын.
Міне, бұл бағдарламалық құжатта отандық діни білім беру әлеуетін қалыптастыру жөнінде жаңа міндеттер қойылады. Имамдардың бойында тақуалық, мейірімділік, сабырлылық сияқты қасиеттермен бірге, отансүйгіштік қасиеттің де болуы қажет деген талап бар.
Шынында, нағыз мұсылман мен имамның имани келбеті қалай болу керектігі бүгінде ешкімді бейжай қалдырмасы анық. Өйткені, имамның Алланың алдындағы жауапкершілігі өте жоғары. Рухани білім де, дүниеауи таным да имамның дәрежесін көтере түспекші.
Алғаш рет ұйымдастырылып отырған ел имамдарының бұл форумы осы келелі мәселелерді талқылауымен маңызды екенін айтар едік. Қазіргідей әлемде исламға мол қауіп төніп тұрғанда, жат ағымдардың жетегіне түсіп, адасып жүрген бауырларымызды ата-баба ұстанған дәстүрлі шариғат жолына салу да басты мәселелердің бірі. Сондай-ақ, тұжырымдамада елімізге келіп жатқан теріс діни әдебиеттерге тосқауыл қойып, ондай еңбектерді өзімізде басып шығаруға да баса назар аударылмақшы. Сондықтан, біз бұл форумнан кейін дін саласында игі өзгерістер бастау алады деп сенеміз.
