Аудан кәсіпкерлері көктемгі ықтимал су тасқынынан туындаған мәселелерді шешуге белсене атсалысуда. Биылғы жылдың су тасқынына өңірдің барлық қызметі дайындалғандықтан, бүгінгі таңда олардың бірлескен қимылы нәтижесін беріп отыр.
Көзделген барлық шаралар тыңғылықты орындалуда. Бұл жұмысқа ауданның бизнес өкілдері үлкен көмек көрсетті. Өткен жылы су тасқынынан зардап шеккендер үшін 3 миллион теңгенің тамағы кәсіпкерлер күшімен ұйымдастырылған еді. Сондай-ақ, техника мен күнделікті тұтынатын тауарлар жағынан көмектесті.
Биыл да олар алдыңғы қатардан көрініп, су тасқынына қарсы күресте жергілікті атқарушы органдарға қолұшын созып отыр. Еріген суды ағызу үшін сайлар тазалануда. Қауіпті аумақтардан отбасылар және олардың мүлкі көшірілді. Суды тоқтататын бекініс үшін құм, қиыршық тас, күл тасымалдануда. Тұрғындардың мүлкін сақтау үшін арнайы орын бөлінді. Мәселен, «Фолян және К» жауапкершілігі шектеулі серіктестігі мүлік қою үшін өздерінің барлық қоймаларын ұсынды. Зардап шеккендерге көмектесу үшін автокөлік, арнайы техника мен кәсіпорын жұмысшыларын бөлді. «Ерлан» жауапкершілігі шектеулі серіктестігі көмекке тіркемесімен екі «КамАЗ» және арнайы техника жіберді. Сондай-ақ, кәсіпорын зардап шеккендер мен су тасқынымен күресушілерге монша мен қонақ үй қызметін тегін ұсынуды көздеп отыр.
Бұл ауданда су тасқыны қауіпінен күрделі жағдай қалыптасқан еді. Апаттың күшін кері қайтару үшін арнайы штаб құрылды. Өңірдің 90 шағын және орта бизнес субъектісі су тасқынына қарсы шараларға қатысуда.
Облыстық кәсіпкерлік палатасының баспасөз қызметі.
Атбасар ауданы.
