«Нұр Отан» партиясының облыстық филиалы жанындағы мүмкіндігі шектеулі азаматтарға кедергісіз орта құруды мониторингілеу жөніндегі қоғамдық кеңестің кезекті отырысында өңірімізде осы бағытта атқарылып жатқан жұмыстар пысықталды.
Жиынға қатысқан партияның облыстық филиалы төрағасының бірінші орынбасары Ғалым Бекмағамбетов тұшымды ойларымен бөлісті.
Шыны керек, қазіргі таңда мүмкіндігі шектеулі жандарға бәрі қолжетімді, қоғам арасында олар үшін кедергісіз орта қалыптасты деп айту қиын. Біраз ғимараттарда арбаға таңылған азаматтардың емін-еркін қозғалуы үшін пандустар қарастырылмаған. Қоғамдық кеңес отырысында осы мәселе назардан тыс қалмады. Зеренді ауданында осы мақсатта жоспарланған бірде-бір істің жүзеге аспағаны партиялықтар тарапынан қатты сынға алынды.
Барлық баяндамашыларды тыңдай келе, партияның облыстық филиалы төрағасының бірінші орынбасары Ғалым Бекмағамбетов тағдыр тәлкегіне тап болған жандардың мәселесіне бей-жай қарамауды қатаң ескертіп, оларды жұмысқа орналастыру, әркез қол ұшын беру қажеттігін айтса, «Шанс» қоғамдық бірлестігі төрағасының орынбасары Рамазан Мұқатаев мүмкіндігі шектеулі тұлғаларға кедергісіз орта құрудың тетіктері жайлы әңгімелеп берді.
«Арқа ажарының» өз ақпараты.
