Бас мүфти Ержан қажы Малғажыұлының тапсырмасымен Рамазан айын ұйымдасқан түрде өткізуге ден қойылды. Көкше жерінде де жергілікті билік мешіттің ұсынысын қабыл алып, көше бойларына «Қош келдің, Рамазан!» деген айшықты жазулары бар баннерлер орнатылды.
Қоғамдық көліктерге де ораза айының тағылымын паш ететін жапсырмалар желімделіп, ізгілік айынан хабар береді. Бұл өз кезегінде адамдардың бір-біріне деген мейірімділік пен кешірімшіл көңіл-күйін көрсетсе керек. Әркім бұл айды тек имани тұрғыда өткізу керек екеніне қаныға бастағанын да аңғартады.
Ал, орталық мешіт жаны да құлпырып кеткен бе дерсің. Жылдағыға қарағанда ерекше абаттандырылып, алқызыл гүлдерге көмкерілген. Әсіресе, тарауық намаздарын мешіт ауласында оқып, Аллаға құлшылық етуге мол мүмкіндіктер бар. Осының бәрі ораза айының тағылымды бір сипаты дер едік.
