«Ақмола Медиа Орталығында» Қазақстан Республикасы Инвестициялар және даму министрлігі Геология және жер қойнауын пайдалану комитетінің төрағасы Базарбай Нұрабаевтың қатысуымен өткізілген баспасөз мәслихатында «Ұлт жос-пары – 100 нақты қадам» бағдарламасына орай, осы салада атқарылып жатқан жұмыстар баяндалды.
Сондай-ақ, шараға аталған комитеттің Көкшетау қаласындағы «Солтүстікқазжерқойнауы» Солтүстік Қазақстан өңіраралық геология және жер қойнауын пайдалану департаментінің басшысы Ербол Әділханов және облыстық кәсіпкерлік және өнеркәсіп басқармасының басшысы Берік Мұстафин қатысты.
Мемлекет басшысы Нұрсұлтан Назарбаевтың бес институттық реформасын жүзеге асыруға бағытталған «100 нақты қадам» бағдарламасы бойынша әзірленіп жатқан құжаттар мен жоспарлар жөнінде халықты ақпараттандырып, түсіндіру жұмыстары еліміздің әр жерінде қолға алынған.
Осы шара аясында Ақмола облысына арнайы ат басын тіреген Қазақстан Республикасы Инвестициялар және даму министрлігі Геология және жер қойнауын пайдалану комитетінің төрағасы Базарбай Нұрабаев соңғы жылдары Қазақстанда геологиялық барлау саласына үлкен назар аударылғаны және жыл сайын қаржыландырудың ұлғайып келе жатқандығын ерекше атап өтті.
Оның айтуынша, өткен жылы елімізде 2010-2014 жылдарға арналған Қазақстан Республикасының минералды шикізат кешенін дамыту жөніндегі бесжылдық бағдарламаны іске асыру аяқталды. Осы бағдарламаның аясында еліміздің барлық өңірлерінде, моноқалаларға жақын орналасқан учаскелерде өңірлік, геологиялық түсіру, іздеу, бағалау және барлау жұмыстары жоспарлы жүргізілді. Оның ішінде Степногорск қаласы да бар.
–Биылғы жылы геологиялық барлауға 12,5 миллиард теңге бөлінді. Оның жартысына жуығы Ұлттық қордан «Нұрлы жол» бағдарламасы аясында бөлініп отыр. Бұл қаржының 1 миллиард теңгесі «Қазгеологияға» берілді. Осы қаражат кенді аймақтарда барлау жұмыстарына жұмсалады, – деді өз сөзінде Базарбай Нұрабаев.
Сонымен қатар, комитет төрағасы геология және минералды ресурстарды дамыту туралы, оның ішінде саланы халықаралық стандарттарға көшіру және инвестициялық ахуалды арттыру барысын әңгімелей келе, «Ұлт жоспарын» халыққа түсіндіру арқылы осы құжатты іске асыру бойынша ұсыныс-пікірлерді білу маңызды екенін ерекше атап өтті.
