«ҚазАгроҚаржы» акционерлік қоғамы ауыл шаруашылығы техникасының лизинг жағдайын жеңілдететін бағдарламасын жасады.
Бағдарлама бойынша атаулы қаржы институты қазақстандық диқандарға лизингтің екі түрін ұсынады. Оның біріншісінде фермер кепілдіксіз техника ала алады. Ол үшін бұрынғы 15 пайыздың орнына 10 пайыз мөлшерінде бірінші төлемді төлейді. Екінші түрінде ол төлемді кейінге қалдырып, техника бағасының 10 пайызы мөлшерінде орақтың астығын кепілдікке қойып, комбайнды пайдалана алады. Фермер бірінші лизинг төлемін төлесе, кепілдіктен босатылады. Мұндай жағдай астық кептіргіш, күріш пен мақта жинайтын техникалар лизингісіне қатысты.
Орақ техникасы оның құнының 12,8 пайызы жағдайында беріледі. Мемлекет қаржыландырудың жалпы ставкасының 7 пайызын субсидиялайды. Сөйтіп, ауыл шаруашылығы техникалары лизингісінің ставкасы жылына 12,8 пайыздың орнына 5,8 пайызды құрайды. Бүгінгі таңда «ҚазАгроҚаржы» акционерлік қоғамы өтінімдер жинауды белсенді жүргізуде. Отандық өндірушіні қолдау үшін басымдық «АгроМашХолдинг» және «Вектор» комбайн зауыттарында жиналған қазақстандық комбайндарға беріледі.
«Арқа ажарының» өз ақпараты.
