2016 жыл да, берекелі, мерекелі өткен жылдағыдай, айтулы оқиғаларға, жемісті белестерге толы болғалы тұр.
Солардың ішіндегі ең бастысы, еліміздің өз егемендігін қолына алғалы ширек ғасыр жүріп өткен жасампаз да жарқын жолын айғақтайтын Тәуелсіздігіміздің 25 жылдық мерейлі тойы. Жыл ішіндегі толайым істеріміз, еңбек тартулары, халқымыздың ізгі ниет, ақ пейілінен туындаған небір жақсы жоралғыларымыз осы ұлық мерекеге арналатындығы анық.
Биыл сондай-ақ, қазақ жерінде 1916 жылы орын алған ұлт азаттық көтерілісіне – 100 жыл.
Бұл көтеріліс қазақ халқының көп ғасырлық ұлт-азаттық қозғалысының тарихында маңызды орын алды. Ол отарлауға және империалистік саясатқа қарсы өрбіді. Әсіресе, халық батыры Амангелді Иманов бастаған Торғай көтерілісі 50 мың адамға дейін қамтып, патша өкіметі құлатылғаннан кейін барып ғана тоқтады.
Бұл жылдың еншісіне өз азаттығын аңсаған ұлтымыздың тағы бір ерлік белесі де жазылмақшы.
1986 жылы Алматыда болған Желтоқсан оқиғасы қазақ жастарының бұрынғы Кеңес одағының отаршылдық, әміршіл-әкімшіл саясатына қарсы шыққан халқымыздың тарихындағы елеулі оқиға болып табылады. Кезінде бүкіл әлемді дүр сілкіндіріп, өзге одақтас республикаларда да тоталитарлық жүйенің іргесі сетінеуіне алып келген осы оқиғаға да биыл жыл аяғында 30 жыл толады.
