Көкшетау техникалық институтында Елбасының Қазақстан халқына арнаған Жолдауын түсіндіріп, насихаттау жөнінде шара болып өтті. Оны институт басшысының орынбасары, подполковник Сайранбек Бекмағамбетов ашып, кезекті Жолдау көкейкесті мәселелерді көтеріп отырғандығын атап өтті.
Одан әрі сөз алған облыстық ішкі саясат басқармасының басшысы Айна Мысырәлімова 1 қаңтардан бастап «5 институттық реформаны жүзеге асыру бойынша 100 нақты қадам» Ұлт жоспарын орындаудың практикалық кезеңі басталғанын, бұл барлық қиындықтарды жеңуге сеп болатын, ұлт мүддесі үшін жасалған бағдарлама екендігін айта келіп, бүгінгі дағдарыс уақытында жастардың бірқатары жұмыссыз жүргендігі, бізде құрылысшы, электрик сияқты мамандардың жетіспейтіндігі міне, жастар осындай жұмысшы мамандықтарын игеруді, сөйтіп, қоғамнан өз орындарын табуды ойламай болмайтындығы жөнінде орынды пікірлерді ортаға салды.
Подполковник Дәулет Шаяхимов Президент Жолдауының «Мәңгілік Ел» болуды мақсат еткен мән-маңызына тоқталып, осы жауапкершіліктің жастарға да молынан жүктелетінін жеткізді.
Оқу-әдістемелік бөлімінің капитаны Әсем Бекмұхамбетова өз сөзін ұлт болашағы білімді жастардың қолында деп түйіндеді. Жолдаудың қоғамымыз үшін алар орны ерекше екенін түсінген жастар да сөз алып, ел болып әлемді дүрліктіріп жатқан қиындықтардан ойдағыдай шығатындығымызға, өздерінің парызы туған елін, Отанын көздің қарашығындай қорғау екеніне нық сенімдерін білдірді.
Ақынбай СӘРСЕНБИ.
Көкшетау қаласы.
