Қазақстан Республикасы Тәуелсіздігінің 25 жылдығына орай, Қазақстан халқы Ақмола ассамблеясы және Аналар кеңесі бірлесіп «Жүректен жүрекке» атты іс-шаралар онкүндігін өткізбекші.
Республикалық «Қайырымдылық керуені» акциясы аясында ұйымдастырылып отырған шара 8 ақпан күні Достық үйінде сағат 16.00-де бастау алады. Бұл күні мүгедектердің «Аялау» орталығы және мүгедек балаларға арналған №20 арнайы мектеп-интернаттың тәрбиеленушілері үшін театрландырылған қойылым көрсетіледі. Ал, келесі күні акция «Аялау» қайырымдылық қорында жалғасын табады. Онда «Бари» армян этномәдени орталығы Аналар кеңесімен бірлесе отырып, жарымжан балаларға көмек қолын созады.
10 ақпан күні, сағат 15.00-де Ақмола облысының поляк қауымдастығы облыстық кәріс қауымдастығы бірлесіп, осындай қайырымдылық шарасын өткізеді. 16 ақпан күні Достық үйінде мұқтаж жандарға арналған қайырымдылық аукционы бастау алады. Кәсіпкерлер, қалталы азаматтар тұрмысы төмен отбасыларына мектепке қажетті құрал-жабдықтар сатып әперіп, мүгедек балаларға демеушілік жасайды деп күтілуде.
Қайырымды азаматтардың барлығын аталған іс-шараның басы-қасында болуға, мұқтаж жандарға көмек көрсетуге шақырамыз.
«Арқа ажарының»
өз ақпараты.
